Juristja Eni Çobani ka komentuar vrasjen e Sabrina Bengës, të cilës iu pre jeta në moshën 23-vjeçare nga duart e ish-bashkëshortit të saj.
E ftuar në “Rudina”, Çobani tha se ajo është shumë e prekur nga ngjarjet e fundit duke u shprehur se deri në këtë pikë nuk mund ta quajmë dot Shqipërinë një shoqëri normale evropian nëse vrasim gratë dhe vajzat.
“Si mundet që një shoqëri normale evropiane, perëndimore sikundër ne pretendojmë të jemi, vret gruan. Në shekullin në të cilin ne jetojmë ne vrasim gruan. Si mund të jemi në normalë në jetën tonë të përditshme?”- tha ajo.
Ajo gjithashtu thotë se faji nuk duhet t’i hidhet ligjit por familjes që aprovon lidhjen e një vajze minorene, vetëm 14 vjeç me një djalë.
“Ajo duhet të ishte në fakultet sot, jo nënë e një fëmije, e larguar nga banesa që në moshën 14 vjeç. Nuk ka marrë përgjigje akoma shoqëria si është e mundur që familja e vajzës ka lejuar që vajza të lidhet me këtë djalë në moshën minorene 14-vjeçare? Pra ka shumë problematika para se të shkojmë tek ligji, familja është nyja nga e cila besoj se duhet të fillojë gjithçka”- është shprehur Eni Çobani.
