Një ngjarje e rëndë u shënua në orët e vona të së premtes, ku Elton Bengaj Metaj, vrau me armë ish-bashkëshorten e tij 23-vjeçe Sabrina Bengaj.
Lajmi tronditi opinionin publik, pasi vajza, kishte urdhër mbrojtjeje sepse problemet me ish të shoqin kishin qenë sistematike. Së fundmi, për ngjarjen e kobshme, ka reaguar dhe nënkryetarja e LSI, Erisa Xhixho.
Nëpërmjet një statusi të gjatë në rrjete sociale, Xhixho, fajëson për ngjarjen jo vetëm të shoqin vrasës, por edhe institucionet që nuk vepruan në kohë. Ajo sjell në vëmendje dhe disa vrasje të tjera ku burrat kanë vrarë gratë, të gjitha të ndodhura gjatë 9 muajve të fundit.
“Sot fjalët nuk kanë më vlerë. Sepse ato as mund ta mbrojnë dhe as mund ta rikthejnë në jetë Sabrinën, ashtu sikundër nuk mund të ringjallin më as Zhaneta Metanin, as Kristina Bardhin, as Liljana Buzon, as Dorina Allën, as Fëllënza Shirjen, as Irvana Hykën, të gjitha të vrara në nëntë muaj të këtij viti!”
Sakaq, Xhixho thotë se kjo vrasje duhet të shërbejë si një kambanë e madhe alarmi, që jeta e gruas duhet të mbrohet dhe shoqëria duhet të reagojë.
“Jeta e Sabrina Bengajt nuk është çështje statistike, është këmbana e madhe e alarmit që bie për të gjithë ne, për të gjithë shoqërinë shqiptare: ta mbrojmë jetën e gruas me forcën e ligjit dhe me reagimin e të gjithë shoqërisë dhe jo me statistika që përballë këtij realiteti kriminal e humbasin vlerën!”- shprehet nënkryetarja e LSI-së.