Në pistën e hetimeve për vrasjen e Alban Semakut disa ditë më parë në Peqin, është shtuar një tjetër dyshim. Dy dyshohet të kenë qenë personat që kanë organizuar dhe më pas kanë kryer vrasjen e 45 – vjeçarit . Protagonistët e këtij krimi, më pas janë ndihmuar nga persona të tjerë për të fshehur gjurmët. Ky dyshim është ngritur mbi të dhënat e fundit, sa i takon rrëmbimit, torturimit të anëtarit të Aldo Barës, në Lushnjë dhe më pas zhvendosjen e trupit të tij të pajetë në një grumbull mbeturinash pranë lumit Shkumbin në Peqin, ku nuk është gjendur asnjë gëzhojë arme.
Deri më tani nuk ka gjurmë të autorëve. Semaku është sjellë i gjallë deri aty dhe më pas është qëlluar me armë zjarri pas shpine me 3 plumba, njëri prej të cilëve në kokë. Dyshimet e para lidhen me të shkuarën e tij, pasi ai vetë ka qenë i dënuar për shumë krime, përfshirë dhe vrasjen.
Policia po fokusohet te kamerat e sigurisë, pasi po kontrollohen filmimet e gjithë itinerarit që mund të kenë ndjekur autorët nga Lushnja në Peqin.
Nga pamjet filmike paraprake nga një lokal, viktima Semaku është kapur duke lëvizur lirshëm në qytet dhe i shoqëruar nga disa persona. Këta të fundit teksa janë marrë në pyetje kanë pranuar se kishin njohje me Alban Semakun, por asnjëri prej tyre nuk ka qenë në dijeni se me cilin person tjetër ka qarkulluar në ditën e shtunë në Lushnjë.
Theksojmë sërish se dyshimet për përfshirjen e 2 personave protagonistë për organizmin dhe më pas vrasjen e anëtarit të bandës së Lushnjës, por ende nuk ka një përcaktim zyrtar.
