Qytetarët janë mbledhur sërish këtë të diel në qendër të Prishtinës, në një protestë për të kërkuar drejtësi për Arlinda Zekajn, e cila u vra një javë më parë nga ish-kunati i saj në banesën në Vitomiricë të Pejës.
Protestuesit kërkojnë zbardhjen e plotë të rastit dhe përgjegjësi nga institucionet, duke theksuar se viktima kishte kërkuar vazhdimisht mbrojtje, por thirrjet e saj nuk morën përgjigjen e duhur.
Një ndër kërkesat kryesore të protestës është dorëheqja ose shkarkimi i ministres së Drejtësisë, Donika Gërvalla, dhe ministrit të Punëve të Brendshme, Xhelal Sveçla.
Sipas informacioneve të bëra publike, Arlinda Zekaj kishte kërkuar për muaj të tërë zbatimin e një vendimi gjyqësor. Më 16 tetor, Gjykata Themelore e Pejës kishte urdhëruar kthimin e saj në banesën e përbashkët me ish-bashkëshortin, pranë djalit të saj.
Megjithatë, pavarësisht kërkesave për ndihmë dhe mbrojtje, ajo u vra me sëpatë nga ish-kunati, Albert Sylaj në Vitomiricë. Rasti ka nxitur reagime të forta dhe pikëpyetje mbi mënyrën se si institucionet trajtuan denoncimet e saj.
Viktima kishte lënë pas edhe prova me shkrim dhe regjistrime zanore, përmes të cilave kërkonte ndihmë dhe denonconte situatën e saj.
Protestuesit kanë paralajmëruar se tubimet do të vijojnë deri në përmbushjen e kërkesave të tyre dhe marrjen e përgjegjësive institucionale për këtë ngjarje të rëndë.
Discussion about this post