Prokuroria e Posaçme kundër Korrupsionit dhe Krimit të Organizuar, pas përfundimit të hetimeve për vrasjen e biznesmenit Behar Sofia, ka dërguar në gjykatë dosjen për pesë të akuzuarit.
Sipas njoftimit, të akuzuarit për krimin e rëndë janë Leonard Xhixha, Bujar Leza, Skënder Vathi, Xhuljano Visha dhe Ernejt Shyti.
Të pestë të pandehurit janë dërguar për gjykim me masë sigurimi arrest në burg dhe të akuzuar për veprat penale si: “Vrasja me paramendim” në dëm të viktimës Behar Sofia, finalizuar në datën 25.2.2021; “Mbajtja pa leje dhe prodhim i armëve, armëve shpërthyese dhe i municionit”, të kryera në bashkëpunim të veçantë, atë të grupit të strukturuar kriminal; “Grupi i strukturuar kriminal” në rolin e pjesëmarrësit dhe “Kryerja e veprave penale nga organizata kriminale dhe grupi i strukturuar kriminal”.
Behar Sofia 66 vjeç u ekzekutua mëngjesin e 25 shkurtit 2021 në Tiranë, në afërsi të Piramidës. Teksa ishte duke ecur në këmbë, Sofia u qëllua nga një armë zjarri me silenciator me dy plumba, njëri prej të cilëve e ka kapur në qafë dhe tjetri në gjoks. Sofia u transferua drejt spitalit me shenja jete, por si pasojë e plagëve të marra nuk mundi të mbijetonte.
Nga kamerat e sigurisë u pa skena e atentatit. Atentatori fillimisht u largua në këmbë dhe në bulevardin “Dëshmorët e Kombit” ka marrë një biçikletë dhe është larguar drejt liqenit Artificial. Viktima nuk ishte i panjohur për autoritetet. Ai njihej ndryshe dhe si Fatmir Sofia apo Behar Seferi. Emri i Sofisë ka dalë dhe në masakrën e Durrësit ku mbetën të vrarë 4 efektivë policie, gjatë operacionit për arrestimin e Dritan Dajtit.
Discussion about this post