Gjykata e Posaçme Kundër Korrupsionit dhe Krimit të Organizuar ka kaluar në gjykim dosjen ndaj Ardian Çapjes, Klajdi Dokolit, Etjen Canit dhe Ervis Bardhit, të akuzuar për vrasjen dyfishtë në Elbasan në vitin 2012 të Gentian e Nezir Beqiri.
Sipas burimeve gjithashtu, gjykata ndau dosjen për dy të pandehurit e tjerë, Florenc Capja dhe Olsi Lekut, për shkak se janë në mungesë, pasi janë ndaluar, njëri në Emiratet e Bashkuara Arabe dhe tjetri në Greqi.
Kujtojmë se Ardjan Çapja u arrestua në mars të këtij viti. Ndërsa në maj u vu në pranga në Dubai, nipi i tij Florenc Çapja, pasi ishte shpallur më herët në kërkim nga autoritetet shqiptare.
Dëshmia e familjarëve të viktimave
Pjesë e rëndësishme e dosjes hetimore që çoi në gjurmët e autorëve të krimit për vrasjen e dyfishtë në Elbasan, ka qenë gjithashtu edhe dëshmia e nënës së Gentianit dhe bashkëshortja e Nezir Beqirit. Më herët ajo tregoi para grupeve hetimore se, shkaktarët për vrasjen e familjarëve të saj janë anëtarët e familjes Çapja, me argumentin se janë e vetmja familje që marrin kërcënime dhe janë në hasmëri. Ajo ka treguar se prej kohësh i druhej një ngjarjeje të tillë, ku familja Beqiri do të përgjakej. Para se të largoheshin nga shtëpia, ajo mësohet të ketë dëshmuar se, babai sigurohej të mbyllte mirë derën, ndërsa në banesën e tyre nuk pranoheshin persona të panjohur. Ndër të tjera ajo ka deklaruar se gjatë kohës që Gentiani ishte në masën e sigurimit “Arrest në shtëpi” i dyshuar si njëri prej autorëve të vrasjes së Sokol Çapjas, në banesë kanë shkuar shpesh Etjen Cani, Lorenc Skilja, të dy banorë të lagjes “Çlirimi”, Elbasan. Sipas nënës së viktimës Gentian Beqiri, këta të fundit dyshohet të jenë bashkëpunëtorë në këtë ngjarje, për faktin se asnjë person i panjohur nuk kishte mundësi të futej në banesë, pasi dera hapej në momentin që ishin bindur se personi ishte i njohuri i tyre. / A. L Gijotina.com /
