Një makinë e djegur është gjetur në afërsi të fshatit Mirakë, në aksin rrugor Elbasan-Librazhd, dhe dyshohet se është përdorur nga autorët e vrasjes së biznesmenit Edmond Hyka, i njohur si Mondi Mëhalla. Sipas informacioneve, autorët qëlluan viktimën sapo ai u fut në automjetin e tij tip Range Rover dhe më pas u larguan drejt Librazhdit me një Audi të zi. 43-vjeçari, i cili kishte precedentë dhe jetonte në zonën Komuna e Parisit në Tiranë, humbi jetën nga dy plumba që e kapën në kokë.
Ngjarja ndodhi mbrëmjen e së dielës, më 30 Nëntor, rreth orës 20:35, në lagjen “Emin Matraxhiu” të Elbasanit, pranë zyrës dhe biznesit të tij. Biznesmeni u qëllua disa herë me armë zjarri brenda automjetit, duke i shkaktuar vdekjen e menjëhershme. Pas ngjarjes, policia ngriti pika kontrolli në të gjitha daljet e qytetit dhe bëri kontrolle në zona dhe ambiente të ndryshme për kapjen e autorëve.
Automjeti i përdorur nga ekzekutuesit dyshohet të ketë qenë një Audi i zi, me të cilin autorët larguan nga vendngjarja pas vrasjes. Njësiti hetimor nën drejtimin e Prokurorisë ka nisur punën për zbardhjen e rrethanave të krimit dhe dokumentimin e plotë të ngjarjes, ndërsa operacioni për kapjen e autorëve vijon intensivisht.
Njoftimi i policise
Elbasan/Informacion shtesë
Në vijim të kontrolleve dhe të veprimeve hetimore që po kryhen nga grupi i posaçëm hetimor, në drejtimin e Prokurorisë, me qëllim zbardhjen e rrethanave të ngjarjes së ndodhur mbrëmë, ku mbeti i vrarë shtetasi M. M., alias E. H., 43 vjeç, ditën e sotme u konstatua në fshatin Mirakë, automjeti tip “Audi”, i djegur, i cili dyshohet se është përdorur nga autorët e kësaj ngjarjeje.
Grupi hetimor, në drejtimin e Prokurorisë, vijon punën për zbardhjen e rrethanave të ngjarjes dhe sigurimin e çdo prove që do të çojë në identifikimin dhe kapjen e autorëve.
Discussion about this post