Autori që kreu vrasjen e Behar Sofisë një vit më parë në qendër të Tiranës, ka dëshmuar para hetuesve mbi porositësin, e këtij ekzekutimi.
23-vjeçari Ernejt Shyti të cilit i premtuan mijëra euro për të vrarë Sofinë, ka treguar para grupeve hetimore se ka dëgjuar nga anëtarët e tjerë të grupit se porositësi kishte dy pseudonime.
“Unë kam dëgjuar Bujarin që i ka thënë Xhuljanos se Bajlozi t’i hedh lekët me çantë te dera e shtëpisë. Në këtë moment Xhuljano e pyeti pse e thërrisnin kështu dhe Bujari i tha se ai ka pasur një pseudonim tjetër, e kemi pas thirrur edhe “I Forti i Myslym Shyrit””.
Shyti tregon se Bujar Leza është personi që ka siguruar mjetet për vrasjen, nga arma të biçikleta, teksa Xhuljano Visha e ka shoqëruar në çdo moment të përgatitjes.
Grupi i hetimit është duke i verifikuar të dhënat e përfituara nga dëshmia e bashkëpunëtorit, të cilët siç thotë SPAK, deri në këtë fazë kanë rezultuar të besueshme dhe korrespondojnë me përgjime dhe verifikimet e tjera.
Vrasja e Behar Sofisë
Behar Sofia 66 vjeç u ekzekutua mëngjesin e 25 shkurtit në Tiranë, në afërsi të Piramidës. Teksa ishte duke ecur në këmbë, Sofia u qëllua nga një armë zjarri me silenciator me dy plumba, njëri prej të cilëve e ka kapur në qafë dhe tjetri në gjoks. Sofia u transferua drejt spitalit me shenja jete, por si pasojë e plagëve të marra nuk mundi të mbijetonte. Nga kamerat e sigurisë u pa skena e atentatit. Atentatori fillimisht u largua në këmbë dhe në bulevardin “Dëshmorët e Kombit” ka marrë një biçikletë dhe është larguar drejt liqenit Artificial. Kjo biçikletë me të cilën u largua atentatori, nga hetimet rezultoi të ishte siguruar nga B.Leza, së bashku me armën me të cilën u qëllua Sofia. Viktima nuk ishte i panjohur për autoritetet. Ai njihej ndryshe dhe si Fatmir Sofia apo Behar Seferi. Emri i Sofisë ka dalë dhe në masakrën e Durrësit ku mbetën të vrarë 4 efektivë policie, gjatë operacionit për arrestimin e Dritan Dajtit. Nga hetimet për vrasjen e biznesmenit Behar Sofia në shkurt të këtij viti, më 26 dhjetor 2021 është bërë i mundur identifikimi i një tjetër personi të përfshirë në vrasjen e Sofisë.
Bashkëpunëtorët në krim
Bashkëpunëtori i pestë në vrasjen e Behar Sofisë është 45-vjeçari B.Leza, i cili mendohet se ka qenë koordinator mes vrasësve me pagesë dhe porositësve të vrasjes. Ndaj 45-vjeçarit GJKKO caktoi masën e sigurisë “Arrest në burg”, masë e cila u ekzekutua ndaj tij në ambientet e burgut të Fushë-Krujës. B.Leza ndodhet në paraburgimin e burgut të Fushë-Krujës për dhunë në familje. “Bazuar në provat e grumbulluara, Gjykata e Posaçme Kundër Korrupsionit dhe Krimit të Organizuar ka caktuar masën e sigurisë “Arrest në burg”, për shtetasin B. L., 45 vjeç, banues në Larushk, Krujë. Specialistët e Sektorit për Hetimin e Krimeve të Rënda ndaj Jetës dhe Pronës në DVP Tiranë kanë bërë ekzekutimin e masës së sigurisë ndaj këtij shtetasi, në ambientet e burgut të Fushë Krujës, i cili ndodhet i paraburgosur për veprën penale “Dhuna në familje””, njofton policia. Personi i identifikuar më 26 dhjetor si bashkëpunëtori i pestë në vrasjen e 66-vjeçarit Sofia, nuk është emër i panjohur për policinë. Në vitin 2017 ai është akuzuar për një tjetër vrasje dhe fillimisht u dënua me 15 vite burg, ndërsa më pas akuza ndaj tij ra dhe u shpall i pafajshëm. Sa i përket vrasjes së Behar Sofisë, 45-vjeçari B.Leza ka pasur miqësi me një prej personave të arrestuar më parë për ekzekutimin e 66-vjeçarit. Leza akuzohet për 4 vepra penale në lidhje me rolin e tij në atentatin ndaj Sofisë.
Discussion about this post