Detaje të reja kanë dalë në dritë dy ditë nga vrasja e Can Kariçit në Kodër Kamëz. Mësohet se, policia ka shoqëruar të paktën 15 persona, shumica e të cilëve familjarë e miq të viktimës, apo edhe dëshmitarë okularë në momentin e ekzekutimit.
Por, pavarësisht numrit të të shoqëruarve grupi hetimor nuk ka marrë asnjë të dhënë për motivet apo të krijojë një identitet të autorëve. Ndërkohë burime nga grupi hetimit që po heton për këtë ngjarje thanë se në mjetin e gjetur të djegur në Institut pas krimit nuk ka asnjë të dhënë.
Sa i përket dinamikës së krimit, ngjarja është fiksuar nga dy kamera sigurie, ku viktima po konsumonte kafe. Referuar kamerave të sigurisë, rezulton se Can Kariçi është qëlluar menjëherë sapo ai ka dalë nga lokali dhe ka hipur në automjetin e tij.
Në kamera është fiksuar edhe momenti kur makina tip “Audi” me të cilin lëviznin autorët afrohet pranë makinës së viktimës, dhe aty fillojnë ta qëllojnë, ku si pasoja 30-vjeçari mori 4 plumba. Hetuesit kanë dyshime se personat që kanë kryer ekzekutimin, janë vrasës me pagesë dhe atentati është ka qenë i mirë menduar.
Nisur nga e kaluara e viktimës që rezultojnë me precedent kriminal, hetuesit kanë dyshime se shkak është bërë përplasja mes bandave kriminale. Gjithashtu sipas informacioneve të siguruar mësohet se po hetohet në të njëjtën linjë edhe me vrasjen e dyfishtë të Erigers Mihasit dhe Armando Dumanit në muajin nëntor.
Discussion about this post