Ngjarja e rëndë e vrasjes së Donjeta Pajazitaj e ndodhur para shtatë vitesh në Deçan të Kosovës është rikthyer sërish në media pas vendimit me burgim të përjetshëm të dhënë nga gjykata për autorin.
Vëllai i viktimës, Shkëlqim Pajazitaj ka treguar disa detaje ditën e sotme i ftuar në emisionin “Shqipëria Live” rreth vendimit dhe akuzave që rëndojnë mbi kushëririn e tyre Naser Pajazitaj, si autor i vrasjes.
Lidhur me këtë situatë ai tregon se deri më tani janë mbajtur katër gjyqe, të cilat në disa raste i kanë zbehur edhe shpresën për drejtësinë, por me vendimin e fundit që u dha janë qetësuar disi.
“Ka ardhur koha ne si familje jemi lodhur se nuk po dimë. Nga ana tjetër nuk kemi as mundësi as nuk po dimë si të veprojmë. Nëse don Zoti me sme e humb gjakun e saj do dalin ishalla”.
Njëkohësisht u diskutua edhe një çështje tjetër e cila lidhet me kërkesën e shfuqizimit të vendimit që kushëriri i tyre tashmë i dënuar, ka bërë. Shkëlqimi shprehet se prokuroria është në anën e tyre dhe kërkesat e tij për shfuqizim të vendimit nuk do të plotësohen.
Pajazitaj ka folur sërish pas dhënies së vendimit nga gjykata për burgim të përjetshëm për kushëririn e tyre Naser Pajazitaj. Ai tregoi se është plotësisht i bindur që gjendja shëndetësore e kushëririt të tyre nuk mund ta përballonte kundërshtimin e viktimës, prandaj ngjarja ka edhe autorë të tjerë.
“Ne jena plotësisht të bindur që me atë gjendje shëndetësore që ka pasur ai person nuk ka mundur me i bërë ball Donjetës”.
Shkëlqim Pajazitaj nuk përmendi emra, por thekson se shpresat mbeten tek drejtësia për ta çuar deri në fund çështjen.
Kujtojmë se, Donjeta u vra barbarisht, teksa ishte nisur për të ikur në punë dhe më pas është marrë me makinë nga kushëriri. Pas atij momenti të gjithë kanë humbur kontaktet me viktimën, ndërsa trupi është gjetur pas një muaji nga disa kalimtarë.
Discussion about this post