Gjykata e Apelit Tiranë ka dënuar me burg përjetë Markel Bushin, i cili akuzohet për vrasje të dy kushërinjve në Laç në 2019.
Gjithçka ka nisur pas një konflikti banal mes vëllezërve Bushi dhe dy kushërinjve Jushi, i cili ka agravuar në përdorimin e armëve e më pas vrasjen e dy të rinjve. Ngjarja në fjalë ka ndodhur mbrëmjen e së dielës rreth orës 20:15 në lagjen nr. 1 në qytetin e Laçit.
Ka qenë fillimisht vëllai i vogël i Markel Bushit, M. Bushi i cili pas grindjes me dy kushërinjtë ka marrë në telefon vëllanë e madh dhe kushëririn e tij V. Bushi. Pas sherrit të nisur brenda në lokal, dy palët më pas kanë dalë jashtë për t’u sqaruar, konflikti ka agravuar dhe duke parë që autorët kishin armë me vete, dy kushërinjtë u larguan me vrap. Por, autorët i kanë ndjekur për rreth 100 metra Kelvin dhe Erjon Jushin dhe i kanë qëlluar disa herë me pistoletë. Njëri nga dy kushërinjtë është qëlluar në hyrjen e një pallati në tentativë për të ikur, ndërsa tjetri në rrugë. Plumbat i kanë kapur disa herë në trup kushërinjtë.
Ata u dërguan në gjendje të rëndë për jetën në një spital privat në Tiranë për ndihmë të specializuar, por ndërruan jetë si pasojë e plagëve që morën. Njëri nga dy personat që u vra mbrëmjen e së dielës në Laç ka qenë futbollist. Kelvin Jushi, 30 vjeç, ka qenë pjesë e ekipeve të Laçit, Kastriotit dhe Mamurrasit gjatë periudhës 2009-2014. Jushi ishte një person i njohur, pasi përveçse ish-futbollist kishte në pronësi një lokal në qendër të qytetit të Laçit. Dy viktimat njiheshin në komunitet si njerëz të qetë dhe pa precedent të mëparshëm penal. Ndërsa autorët janë persona të njohur për policinë dhe drejtësinë. Madje njëri prej vëllezërve Bushi, më konkretisht Markeli ishte i dënuar me 9 vite burg në mungesë për grabitje me dhunë me pasojë plagosjen. Ndërkohë kushëriri i tij V. (Pali) Bushi ka qenë i arrestuar dhe dënuar në 2017 për armëmbajtje pa leje, ndërsa është liruar nga drejtësia me shërbim prove.
