Një ngjarje e rëndë ndodhi mbrëmjen e djeshme në Kosovë, ku dy zyrtarë të lartë të Partisë Demokratike të Kosovës, qëlluan me armë zjarri njëri-tjetrin.
Kandidati i PDK-së për kryetar të Pejës, Astrit Ademaj dhe zyrtari i kësaj partie, si dhe ish-kandidati i PDK-së për kryetar të Deçanit, Blerand Kadriaj, kanë mbetur të vdekur pas përplasjes që patën në Pejë. Nga ngjarja mbeti i plagosur edhe vëllai i Astrit Ademajt, Avni Ademaj, i cili sipas mjekut kujdestar në spitalin e Pejës, është jashtë rrezikut për jetën.
Konflkti ndodhi në një lokal në Pejë, ku të dy e kishin lënë të takoheshin në lokalin e Ademajt për të sqaruar një konflikt që nuk kishte lidhje me çështje politike, por me ato familjare. Gjatë sqarimit të konfliktit, të dy politikanët qëlluan drejt njëri-tjetrit me armë zjarri dhe mbetën të vdekur.
Zëdhënësi i Policisë së Kosovës për Rajonin e Pejës, Fadil Gashi ka konfirmuar se pas patrullimit në vendin e ngjarjes, policia ka gjetur dy pistoleta dhe disa fishekë, të cilat dyshohet se janë përdorur gjatë ngjarjes.
Partia Demokratike e Kosovës, përmes një deklarate tha se janë të tronditur nga lajmi tragjik për vrasjen e dyfishtë në qytetin e Pejës. Për rastin ka reaguar edhe kryeministri i vendit, Albin Kurti, duke thënë se bashkohen me dhimbjen e familjarëve për këto humbje tragjike.
PDK njoftoi më herët se në shenjë nderimi për dy viktimat është marrë vendimi për pezullimin e aktiviteteve politike gjatë ditës së stome.
“Ndarja e papritur dhe tragjike nga jeta e Astrit Ademajt dhe Blerand Kadrijajt na ka tronditur rëndë të gjithëve. Në shenjë nderimi dhe respekti për ta, Partia Demokratike e Kosovës ka vendosur që sot të pezullojë të gjitha aktivitetet e saj politike anembanë vendit”, thuhet në një deklaratë nga PDK-ja.
Mediat kosovare raportojnë se në vendin e ngjarjes kanë shkuar Kryeprokurori Agim Kurmehaj dhe Prokurorja Valbona Haxhosaj, për të bërë të mundur zbardhjen e detajeve të reja.
