Ish-ministri i Brendshëm, Sandër Lleshaj ka komentuar vrasjen e efektivit të Lezhës, Saimir Hoxha. Lleshaj tha se ngjarja e sotme është më e rëndë se vrasja e Klodian Rashës. Sipas tij, shoqëria duhet të reagojë njësoj siç bëri edhe në muajin dhjetor, pra me protesta.
Po ashtu, Lleshaj tha se nuk di të thotë nëse për këtë ngjarje duhet të ketë dorëheqje apo shkarkime në nivel drejtuesish, siç ndodhi me të, po tha se duhet të ketë një reflektim nga të gjitha palët.
“Ka dy nivele përgjegjësisë, ligjore që u takon organeve përkatëse dhe përgjegjësi morale, kjo është çështje e brendshme që ndjen një lloj përgjegjësie, nuk drejtoj gisht ndaj askujt. Është një ndër ngjarjet më të rënda, pavarësisht ngjarje që ju i referoheni është shumë e rëndë (vrasja e Klodian Rashës), të cilën drejtësia pjesërisht e ka trajtuar, ende jo plotësisht, por sa i përket goditjes së një efektivi të policisë, vrasjes së tij, kjo është një ngjarje e rëndë, edhe në Kodin Penal trajtohet si një ngjarje e veçantë dhe si e veçantë. Kërkohet një reflektim i veçantë, nuk mund shkoj dëm gjaku i efektivit të policisë, gjaku i një djali të ri, një babai, një prindi, një anëtari të shoqërisë sonë, aq më tepër kur bëhet fjalë për një situatë që është në radarin e institucioneve, dhe që flasim për një rajon urban, dhe një rajon që nuk është tokë e panjohur, e pa administruar, apo e askujt, me saktë informacion ajo sipërfaqe është në përgjegjësinë e disa autoriteteve, ka shumë autoriteteve, vendore, qendrore, më duhet është zonë e mbrojtur. Kjo është një ngjarje që të lëvizë dhe të shtyjë për reflektim, nëse atëherë shoqëria reagoi fort, në mënyrë jo proporcionale, edhe kur vitet një punonjës policie shoqëria duhet të reagojë fort, në respekt të atyre që janë në radhët e Policisë, kanë nevojë që të shohin që policia është me ta. Se nga të gjitha trupat e efektivëve, ne kemi humbje vetëm nga punonjës të Policisë”, tha Lleshaj.
Nënkomisari Saimir Hoxha u qëllua për vdekje ditën e djeshme nga 21-vjeçari Aldi Rama. Trupi i tij u gjet nga kolegët në një kanal pranë zonës së quajtur Ishull, Lezhë.
Ai u dërgua në spital, por nuk arriti të mbijetonte. Policia lokalizoi pas 5 orësh autorin e krimit në zonën e mbrojtur të Kune Vain në Lezhë. I riu u gjet i shtrirë buzë një kanali me një plumb në kokë.
Pranë iu gjet arme me të cilën kishte vrarë oficerin Hoxha dhe kishte qëlluar veten në kokë, duke tentuar kështu vetëvrasjen. Aktualisht, Rama ndodhet në gjendje kritike për jetën në spitalin e Traumës.
