Gjykata e Posaçme e Apelit ka lënë në fuqi masat “Arrest me burg” për Safet Bajrin (Rustemi), Behar Bajrin dhe Astmer Bilalin, të cilët akuzohen se kanë kryer në bashkëpunim vrasjen e Fatbardh Licit në vitin 2018.
Vendimi është marrë nga gjyqtarja Tereza Merkaj, teksa gjatë seancën plenare Safet Bajri ka deklaruar se bisedat në “Sky Ecc”, nuk mund të konsiderohen prova. Sa i përket pamjeve kur kalon me automjet, Bajri ka deklaruar se ka qenë në diskotekë dhe restorant peshku.
“S’e kuptoj se si mund të quhen prova këto përgjime pa lidhje. Unë në diskotekë dhe restorant peshku kam qenë atë ditë. Me ikur në shtëpi, nga ajo rrugë do të kaloj, ku kam kaluar gjithmonë”, ka thënë ai.
Asmer Bilali dhe Behar Bajri ndodheshin në qeli të dyshuar për kryerjen e veprave të tjera penale, teksa Safet Bajri u arrestua nga forcat RENEA më 21 shkurt.
Ata dyshohen për kryerjen e veprave penale; “Vrasje me paramendim” kryer në formën e veçantë të bashkëpunimit, atë të grupit të strukturuar kriminal në dëm të viktimës Fatbardh Lici, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminale.
Për vrasjen e Fatbardh Licit, SPAK ka arrestuar edhe ish miss-in Eria Ago, një emër i njohur për drejtësinë, teksa në atë kohë, dyshohet se ka qenë e dashura e Safet Bajrit (Rustemit). Ajo akuzohet për veprën penale të krijimit të kushteve për të kryer vrasje dhe përkrahje te autorit të krimit.
Burime bëjnë me dije se Eria Ago ka shërbyer si drejtuesja e automjetit me të cilin ndodheshin Astmer Bilali dhe Safet Bajri, duke çuar dy ekzekutorët e Licit drejt Shkodrës ditën e vrasjes.
Fatbardh Lici ka qenë pjesëtar i familjes Lici, vëllai i Sokol Licit dhe Mustafa Lici. Po ashtu ai ka qenë xhaxhai i Ibrahim Licit dhe kunati i Lulzim Kullës, i njohur si i ”forti i Shkodrës, i cili po ashtu është vrarë.
53-vjeçari u ekzekutua më 10 gusht të vitit 2018, teksa po pinte një kafe në një lokal në lagjen Kiras Kjo vrasje dyshohet se erdhi si hakmarrje nga fisi Bajri, pas vrasjes së ish-policit Bërcana.
Ish-polici Boran Bërçana u ekzekutua bashkë me bashkëshorten e tij, Silvi Ndoci, më 15 korrik të vitit të 2018, poshtë banesës që kishin marrë me qira. Ata ndodheshin në makinë, teksa bashkë me ta ndodhej dhe fëmija i tyre 3 vjeç, i cili u shpëtoi plumbave.
Ish-polici Bërçana dyshohej se kishte lidhje me grupin Bajri dhe po ashtu ish-polici Bërçana dyshohej se kishte lidhje në atentatin ndaj Lulzim Kullës në 2018-ën dhe vrasja dyshohet se është kryer nga fisi Lici në Shkodër, që kanë lidhje me Lulzim Kullën, duke qenë se ishte dhëndri i tyre.
Gjatë vitit 2018, në Shkodër kanë ndodhur edhe vrasjet e Lulzim Kullës, Arjan Ferracakut dhe Kujtim Ferracakut, të cilat u pasuan në vitet e tjera dhe nga atentate të tjera në Shkodër, të cilat dyshohet se kanë ardhur si pasojë e përplasjes së përgjakshme të fisit Lici me fisin bajri dhe Bilali.
Discussion about this post