Ish-e dashura e Safet Bajrit, Eria Ago, ka ankimuar në Apelin e Posaçëm vendimin e shkallës së parë për caktimin e masës së sigurisë “arrest në burg” ndaj saj, si e dyshuar për kryerjen e veprës penale “përkrahje e autorit të krimit”.
Mbrojtësi i saj ligjor kundërshton masën shtrënguese, duke argumentuar se provat e paraqitura nga SPAK nuk qëndrojnë.
Gjithashtu, ai ka shtuar se Ago ndodhet e shtruar në spitalin e burgut për shkak të gjendjes së rënduar psikologjike.
Eria Ago u arrestua me urdhër të prokurores Elida Kaçkini, nën dyshimin se ka ndihmuar Safet Bajrin dhe Astmer Bilalin ditën kur ndodhi vrasja e Fatbardh Licit në Shkodër, ngjarje që ka ndodhur në vitin 2018.
Gjatë seancës për vlerësimin e kushteve të masës së sigurisë, Ago ka mbajtur qëndrim mohues lidhur me pretendimet e prokurorisë së Posaçme, duke deklaruar se nuk ka lidhje me ngjarjen dhe se ditën kur është vrarë Fatbardh Lici, ajo ka qenë në Tiranë dhe jo në Shkodër.
Sipas informacioneve, Ago është marrë në pyetje lidhur me këtë çështje në kohën kur ka ndodhur ngjarja, por është lënë e lirë.
Pritet që në shkallën e dytë të gjyqësorit të hidhet shorti elektronik për të përcaktuar gjyqtarin që do të shqyrtojë ankimin dhe më pas ky i fundit do të caktojë datën e seancës.
Për të njëjtën ngjarje, kanë ankimuar në Apel edhe tre të dyshuarit për vrasjen e Licit, Safet Bajri, Astmer Bilali dhe Behar Bajri.
Discussion about this post