Vrasja e Flori Paluçit dhe Aranit Kurtit për një kafe në Manzë, dorëzohet në polici një nga të kërkuarit (Emri)

Gëzim Allçi, 31 vjeç, i shpallur më herët në kërkim, është vetëdorëzuar në Drejtorinë Vendore të Policisë Durrës.

Ai dyshohet se ka ndihmuar autorin e vrasjes së Flori Paluçit të largohej nga vendi i krimit, ngjarje e ndodhur më 22 tetor 2025 në ambientet e jashtme të një lokali në Manëz.

Policia njofton se ndaj Allçit ishte caktuar masa e sigurimit “Arrest në burg” nga Gjykata e Shkallës së Parë të Juridiksionit të Përgjithshëm Durrës, më datë 13 nëntor 2025. Ai akuzohet për veprat penale “Mbajtja pa leje dhe prodhimi i armëve, i armëve shpërthyese dhe municioneve” si dhe “Përkrahja e autorit të krimit”.

Sipas autoriteteve, gjatë vetëdorëzimit, Allçi ka dorëzuar një send në dukje pistoletë, e cila rezultoi të ishte armë sportive me gogla. Ai ka deklaruar se këtë e kishte me vete ditën e ngjarjes.

Ngjarja

Flori Paluçi, 33 vjeç, dhe Aranit Kurti, 23 vjeç, mbetën të vrarë me armë zjarri pas një konflikti të çastit në ambientet e jashtme të një lokali. Hetimet zbuluan se gjithçka nisi nga një debat banal për një kafe, i cili degjeneroi në përdorim armësh dhe përfundoi në tragjedi.

Sipas të dhënave, Daniel Pepa dhe Aranit Kurti kishin shkuar në lokal, ku Pepa kërkoi një kafe. Kamarieri iu përgjigj se ekspresi ishte i fikur, gjë që solli një debat verbal të ashpër.

Në këtë moment ndërhyri Flori Paluçi, duke mbrojtur kamarierin. Përplasja verbale mes tyre u përshkallëzua dhe Paluçi qëlloi me armë ndaj Aranit Kurtit, duke e lënë të vdekur.

Pas këtij momenti, Daniel Pepa reagoi duke qëlluar me armë ndaj Paluçit, i cili mbeti i vdekur në vend.

Pamjet e sigurisë të publikuara më pas treguan lëvizjet e fundit të viktimave, duke konfirmuar se të shtënat ndodhën pas shpine.