Janë mbyllur hetimet për njërin nga personat e arrestuar në atentatin e 15 Marsit 2024 të ndodhur në fshatin Larushk të Fushë-Krujës, ku mbeti i vrarë me 45 plumba kallashnikovi, Gentjan Bejtja.
Edison Haxhiu, pronari i mjetit “Golf 7” tashmë është marrë i pandehur për akuzën e “Sigurimit të kushteve për të kryer vrasje”.
Haxhiu akuzohet se makinën tip “Golf 7” e ka vënë në dispozicion të grupit që kreu vrasjen e Gentjan Bejtjat në 15 Mars 2024, makinë e cila u përdor për të larguar autorët e krimit nga vendi ku ata dogjën makinën tip “Land-Rover”.
Çështja kundër Haxhiut, është veçuar për shkak të përfundim të afateve hetimore dhe aktet kundër tij, pritet ti përcillen shumë shpejt Gjykatës së Tiranës.
Për dy personat e tjerë Ilirjan Beqaraj alias Brahimi (i arrestuar) dhe vlonjatin Flodian Plaku (në kërkim), hetimet vijojnë pasi ndaj tyre prokuroria e Tiranës, ka ngritur akuzën e “Vrasjes me paramendim” kryer në bashkëpunim, “Mbajtjes pa leje të armëve të zjarrit” dhe “Falsifikimit të një pasaporte të Kosovës”.
Plaku dyshohet se fshihet në Spanjë, ndërsa në makinën tip “Golf 7” u zbuluan 12 gjurmë papilare dhe një gjurmë pëllëmbe, e cila rezultoi e provuar se i përket të arrestuarit, Edison Haxhiu.
Automjeti “Golf 7“, u kap nga policia teksa Edison Haxhiu e çoi për ta larë në një lavazh që ndodhet nga pas TEG-ut.
Makina shërbeu si “thesar” për policinë, në të cilën u gjetën dhe gjurmët biologjike të djersës së, vlonjatit Flodian Plakut, i cili ka qenë në grupin e gjuajtësve me pagesë.
Për policinë dhe prokurorinë e Tiranës, vrasja e Gentjan Bejtjas, lidhet ngushtësisht me planet e tij, Ervis Martinaj dhe ish-deputetit të PS Arben Ndoka, për të vrarë vëllezërit Durim dhe Valter Bami si dhe mikun e tyre Marklen Haka.
Gentjan Bejtja, ishte njeriu që mblidhte informacion dhe mbante të strehuara makinat në Larushk, me qëllim vrasjen e vëllezërve Bami në Nikël.
Discussion about this post