Vrasja e Ilaria Sulës ka tronditur qytetin e Ternit, një qytet i vogël, larg zhurmës dhe një realiteti ku krime të tilla janë jo edhe aq të rralla. Familja Sula jetonte prej 25 vitesh në shtetin italian, dhe me siguri mes jetës së përditshme as nuk e kishin çuar nëpër mend që një ditë një ngjarje e tillë kaq e rëndë do t’u ndodhte pikërisht atyre.
Vrasja është konsideruar si tronditëse edhe nga komuniteti shqiptar i cili jeton në këtë qytet. Artur Rexho, kreu i “UIL, Il Sindicato dei Cittadini” dhe njëkohësisht mik i familjes, ka reaguar për BalkanWeb duke u shprehur se kjo që ka ndodhur i ka prekur të gjithë.
“Ata janë një familje shumë e qetë, e respektuar dhe totalisht e integruar në komunitet. Fillimisht në Itali ka ardhur babai i Ilarias, Flamur Sula, dhe më pas e kemi ndihmuar që të marrë edhe familjen dhe prej kohësh ishin të pajisur me dokumentet italiane. Vajza jetonte në Romë pasi vijonte studimet dhe ishte një studente shumë e mirë”, tha ai.
Zoti Rexho ka sqaruar gjithashtu se ngjarja shihet si një femicid dhe se arsyeja e vërtetë e krimit mund të ketë qenë fakti që autori dhe viktima sipas tij ishin në proces ndarjeje. Autori i ngjarjes, Mark Antony Samson, sipas mediave italiane ka deklaruar në polici se krimi ka ndodhur në banesën ku ishin të pranishëm edhe prindërit e tij.
Këtë fakt Rexho e lidh me faktin se mbase vajza është thirrur me idenë e një sqarimi të fundit në lidhje me marrëdhënien e tyre, dhe më pas ka ndodhur vrasja e 22-vjeçares shqiptare. Sipas burimeve jo zyrtare, zoti Rexho shprehet se ajo që e ka çuar policinë që të dyshojë tek autori, kanë qenë pikërisht komunikimet telefonike me Ilarian, ku kishte edhe kërcënime dhe evidentohet se e reja mund edhe të ishte e dhunuar prej tij.
Discussion about this post