Vrasja e Ilaria Sulës nga ish i dashuri, Prokuroria e Romës kërkon gjykim të menjëhershëm për Mark Samson! Babai i 22-vjeçares: Drejtësia të vihet në vend

Prokuroria e Romës ka kërkuar gjykim të menjëhershëm për Mark Antony Samson, 23 vjeç, i cili ka pranuar fajësinë për vrasjen e ish-të dashurës së tij, Ilaria Sula.

Vrasja ka ndodhur në një apartament në rrugën Homs, në lagjen Africano të Romës, ku e reja shqiptare është goditur me tre goditje thike në qafë dhe më pas trupi i saj është fshehur në një valixhe dhe hedhur në një greminë në zonën e Capranica Prenestina.

Prokurorët, nën drejtimin e prokurorit të shtetit Giuseppe Cascini, e akuzojnë Samson për vrasje të qëllimshme me paramendim, motive e ulëta dhe lidhja afektive me viktimën, si dhe për fshehje kufome.

Në këtë procedim është nën hetim edhe nëna e Samson, e dyshuar për bashkëpunim në fshehjen e trupit.

Hetimet

Ndër provat që kanë rënduar pozitën e Samson është edhe një mesazh që hetuesit kanë gjetur në telefonin e tij, ku ai u shkruante miqve për Ilarian: “Ose kthehet me mua, ose do ta vras”.

Në vendimin e prillit të kaluar, me të cilin u konfirmua ndalimi dhe u caktua masa e arrestit me burg, gjyqtarja hetuese Antonella Minunni theksoi se “ajo që bie në sy është vetëkontrolli dhe qartësia me të cilën Samson vepron, veçanërisht pas vrasjes së Ilaria-s.”

Pavarësisht deklaratave të tij se nuk mund të jetonte pa të dhe se nuk mund ta imagjinonte jetën pa të, ai vazhdoi jetën e tij sikur asgjë të mos kishte ndodhur.

Sipas hetimeve, pas vrasjes, ai takoi një shoqe të Ilaria-s, hëngri një piadinë me të dhe bisedoi si për problemet që kishte pasur me Ilaria-n, ashtu edhe për çështje të zakonshme e pa rëndësi.

Gjyqtarja shtoi se Samson nuk shfaqi asnjë ndjeshmëri apo pendesë, duke i dërguar të atit të vajzës mesazhe të rreme si të ishin dërguar nga vetë Ilaria, dhe njësoj veproi edhe me shoqet e saj, duke i lënë të besonin se ajo ishte ende gjallë.

Pas kërkesës së prokurorisë ka ardhur edhe një reagim nga familja e Ilaria, ku babai i saj është shprehur sërish se kërkon drejtësi për të bijën.

“Ata njerëz i kanë shkaktuar shumë dhimbje familjes sime. Shpresoj që drejtësia të vihet në vend”, ka deklaruar Flamur Sula, babai i Ilaria-s për ANSA.

“Ilaria kishte gjithë jetën përpara. Nuk është e drejtë që princesha ime të përfundojë në këtë mënyrë të tmerrshme. Kam besim në drejtësinë italiane,” përfundoi Flamur Sula.