Vrasja e ish policit Xhelal Reçit mëngjesin e sotëm në Laç ka qenë e paralajmëruar, pasi një vit më parë i është bërë atentat djalit të tij Besnik Reçit dhe familjarëve, të cilët i shpëtuan plumbave. Nuk dihet ende nëse vrasja e Reçit lidhet me të shkuarën e tij, për të cilën policia po heton. Burime për gijotina.com bëjnë me dije se ish-polici është ekzekutuar në afërsi të bizneseve të tij, pasi njihej si pronar i një butiku dhe i një bar kafeje në këtë qytet.
Ndërsa mendohet se autorët e kanë ruajtur dhe vëzhguar prej ditësh 60-vjeçarin para se ta vrisnin atë. Sakaq, pranë lumit në Laç është gjendur një mjet i djegur që dyshohet të jetë i autorëve, identifikimi i të cilëve pritet të bëhet pas kqyrjes së kamerave të sigurisë që mund të hedhin dritë edhe mbi dinamikën e ngjarjes.
Djali i ish- policit Besnik Reçi ishte bashkë me familjen në makinë, gruan dhe dy fëmijët e mitur, kur u qëllua nga dy persona me motor. Më datë 15.08.2020, në lagjen ‘’Xhenjo’’Lezhë, në rrugën Lezhë-Shëngjin, motori ndoqi automjetin e Besnik Reçit, duke e qëlluar tre herë, por fatmirësisht plumbat nuk kapën asnjë. Autorët e atentatit nuk janë identifikuar as sot.
