Janë zbardhur detaje të reja nga hetimet për vrasjen e sipërmarrësit italian me biznes në Shqipëri, Edoard Sarchi, ngjarje e ndodhur mesnatën duke u gdhirë e shtuna e 27 shtatorit, në zonën e Salarisë, në Tepelenë.
Edoard Sarchi u gjet pa shenja jete nga uniformat blu në anë të rrugës në vendin e quajtur Dilan mes Nivicës dhe Salarisë, teksa pranë ishte dhe automjeti i tij.
Burime bëjnë me dije se në Polici janë shoqëruar Eqerem Braçe së bashku me dy djemtë e tij, Daniel dhe Gazmend Braçe, dhe një person i katërt, si personat që kanë dijeni mbi krimin, pasi kishin shkuar së bashku me viktimën për gjah.
Mësohet se Daniel, Gazmend dhe Eqerem Braçe janë marrë 4 herë në pyetje, fillimisht nga Oficerët e Policisë Gjyqësore, Prokuroria, Specialistët e Krimeve të Rënda e në fund përsëri nga OPGJ. Kjo marrje në pyetje është bërë për shkak se të tre këta persona kanë dhënë dëshmi kontradiktore me njëri-tjetrin. Ndërkohë personi i 4-t nuk është thirrur ende për tu marrë në pyetje.
Fillimisht këta persona kanë thënë se e kanë gjetur italianin Edoardo Sarchi të vdekur në anë të rrugës, e më pas kanë thënë se e kanë gjetur të plagosur dhe u vdiq në duar, ndërsa versioni i tjetër është se ka qenë së bashku për gjah dhe se dikush u kishte prerë rrugës dhe u ka qëlluar me armë zjarri.
Burime bëjnë me dije se grupi hetimor ende nuk e ka përcaktuar vendin e saktë se ku ka ndodhur krimi, pasi ka dyshime se italiani mund të jetë vrarë në vend tjetër dhe të jetë sjellë më pas tek vendi ku u gjet.
Ndërkohë trupi i viktimës është dërguar në Tiranë ku po kryet ekspertiza mjeko-ligjore për të përcaktuar shkaqet e sakta të vdekjes si dhe për të kuptuar nëse plaga në kofshë është shkaktuar nga qitja me armë zjarri apo është shkaktuar nga diçka tjetër.
Ndërkohë për ekspertizë janë dërguar dhe dy armë gjahu për të kuptuar nëse me këto armë është bërë qitje dhe a kanë lidhje me plagën e konstatuar në trupin e viktimës.
Discussion about this post