Gjashtë të dyshuar janë arrestuar në Ekuador të enjten në lidhje me vrasjen e kandidatit për President të vendit, Fernando Villavicencio. Politikani u qëllua për vdekje teksa po largohej nga një fushatë në Quito. Personi i armatosur u vra në një shkëmbim zjarri me forcat e armatosura.
Ministri i Brendshëm ekuadorian Juan Zapata e përshkroi vrasjen si një “krim politik të natyrës terroriste” që synon sabotimin e zgjedhjeve presidenciale të 20 gushtit. Ai shtoi se “të arrestuarit i përkasin bandave të krimit të organizuar”.
“Policia kombëtare ka kryer arrestimet e para të autorëve të dyshuar të kësaj ngjarjeje të neveritshme dhe do të përdorë të gjithë kapacitetin e saj operativ dhe hetimor për të zbuluar motivin e këtij krimi dhe autorët e tij intelektualë”, deklaroi ministri Zapata.
“Të gjithë ata, përfshirë të ndjerin, janë kolumbianë”, tha policia për agjencinë e lajmeve AFP. Gjatë arrestimeve dhe bastisjeve, policia gjeti armë duke përfshirë një pushkë, një automatik, katër pistoleta, tre granata, dy karikatorë pushkësh dhe katër kuti municionesh. Ata gjetën edhe një automjet të vjedhur.
Discussion about this post