Detaje të reja janë zbuluar nga atentati i mbrëmjes se djeshme në Kamëz, ku mbeti i vrarë Can Kariçi. Gijotina.com mëson se të paktën dy persona dyshohet se e kanë ekzektuar mbrëmjen e djeshme 30-vjeçarin.
Sipas informacioneve, makina Audi që u dogj në Institut e cila dyshohet se është e autorëve, ishte me targa të huaja dhe brenda saj është gjetur edhe një kallashnikov. Dy atentatorët, njëri mund të ketë bërë rolin e qitësit, ndërsa tjetri ka drejtuar makinën, ende nuk janë identifikuar.
Ngjarja e rëndë ndodhi mbrëmjen e djeshme ku Kariçi u gjet i plagosur në makinën e tij rreth orës 20:00 dhe ndërroi jetë rrugës për në spital. Pista kryesore ku po hetohet ngjarja është e shkuara e të riut, pasi nga kërkimet e Gijotina.com rezulton se më 26 shkurt të këtij viti Kariçi u arrestua në kuadër të një aksioni të ushtruar nga Forcat Speciale Renea, me një armë zjarri pistoletë “GLOCK”, me një krehër me 14 fishekë dhe gjatë kontrollit fizik në xhepin e xhupit iu gjet një krehër i markës “GLOCK”, me 16 fishekë të kalibrit 9 mm pa leje.
Dyshohet se Kariçi është pjesë e sagës së vrasjeve mafioze, lidhur kjo edhe nga fakti se ai është njohur me Riges Mihasin dhe Armand Dumani, të cilët u vranë me breshëri armësh nga një automjet në lëvizje në zonën e Astirit, ngjarje e ndodhur në nëntor të këtij viti.
Sakaq, policia ka rrethuar zonën dhe vijon krehja e saj për të bërë të mundur identifikimin dhe kapjen e autorëve.
Discussion about this post