Procesi gjyqësor në mungesë në ngarkim të Laert Haxhiut vijon ende. Ai është autor i dyshuar i vrasjes së Zamir Latifit dhe Jurgen Hoxhës, ngjarje kjo e ndodhur në Lushnje. Gjykata e Posaçme ka pyetur këtë të mërkurë disa nga dëshmitarët. Mes tyre ishte Saimir Taullau, pronar i karburantit pranë të cilit ndodhi ngjarja si dhe menaxherin Lorenc Lala.
Taullau dhe Lala në asnjë moment nuk pranuan se në pamjet filmike të shfaqej Laert Haxhiu apo Orgest Bilbili, ndërsa identifikuan disa nga personat që kanë vizituar karburantin dhe lokalin ditën e ngjarjes. Taullau këmbënguli se nuk e ka parë ditën e ngjarjes anjërin prej tyre në biznesin që menaxhonte.
Për Taullaun, prokurorja Doloreza Musabelliu kërkoi rrëzimin e dëshmisë, për shkak se ka mospërputhje në dy deklaratat e tij në dy kohë të ndryshme ku i referohet njohjes së dy personave që dyshohet të jenë përfshirë në ngjarje.
Në seancën e parë të pyetjeve deklaroi prokurorja, Taullau ka thënë se nuk i njeh personat që shfaqen në videon pranë karburantit, ndërsa në seancën e kësaj të mërkure ai i identifikoi, duke pretenduar se ia kishin treguar pamjet bardhë e zi.
Gjithashtu, prokuroria tha se në dëshminë e parë, Taullau deklaruar se pas ngjarjes, i ka dërguar njerëz familjes së viktimës Zamir Latifit për të treguar se ai nuk ka lidhje me ngjarjen, ndërsa sot nuk ka pranuar një fakt të tillë.
Dëshmitari tjetër, Lorenc Lala tha se Laert Haxhiun dhe Orgest Bilbilin i njihte. Të parin thotë se e kishte takuar në burg ku shton se shkoi për t’i dërguar ushqim pronarit të tij Saimir Taullaut që ndodhej prapa hekurave 8 vite më parë, dhe bashkë me të ndodhej edhe Laert Haxhiu.
Për masakrën e Lushnjes GJKKO ka dënuar me burgim të përjetshëm Orgest Bilbilin dhe Anterio Kaloshin, të shpallur fajtor për vrasjen e Zamir Latifit dhe Jurgen Hoxhës, si dhe plagosjen e Bujar Turkut dhe Marius Xhepexhiut, në Lushnjë në 2017.
Ndërkohë që ka rinisur procesi në mungesë për Leart Haxhiun, i cili ndodhet në fazën e pyetjes së dëshmitarëve. Masakra është konsideruar nga autoritetet si një tentative e Orges Bilbilit e Laert Haxhiut, për ekzekutimin e nipit të Aldo Bares, Xhulio Shkurtit.
Discussion about this post