Forcat RENEA kanë ushtruar sërish kontroll natën e kaluar në banesën e 31-vjeçarit Ervis Lamit në fshatin Zall Mner të Kamzës, i cili është i dyshuar për vrasjen e 48-vjeçari Lulzim Visha mëngjesin e të premtes së 24 Janarit.
Zyrtarisht ndaj tij nuk është ngritur akuzë për vrasje, por është shpallur në kërkim për veprat penale “Mbajtja pa leje dhe prodhimi i armëve, armëve shpërthyese dhe e municionit” dhe “Prodhimi, mbajtja, blerja apo shitja pa leje e armeve të ftohta”.
Burime bëjnë me dije se kishte dyshime se ai mund të ishte kthyer në banesë, por mësohet se sërish nuk është gjetur aty.
Sipas sistemit TIMS, Lami ndodhet në Shqipëri dhe nuk rezulton që të ketë kaluar kufirin. Megjithatë ka dyshime se ai mund të jetë larguar ilegalisht në Kosovë.
Policia është hermetike sa i takon provave që mund të kenë gjetur në banesën e Lamit, që mund ta lidhin atë me vrasjen e Lulzim Vishës.
Nga kontrolli i ushtruar herën e parë pas atentatit, në banesën e Ervis Lamit janë gjetur një armë zjarri automatike me silenciator dhe municion luftarak, 15 copë fishekë luftarak, një sopatë, një thikë, një këllëf pistolete glok. Gjithashtu, në oborrin e banesës janë gjetur dhe 4 gëzhoja armë.
Burime për mediat bëjnë me dije se kanë qenë dy godina, ku njëra prej të cilave ishte shtëpi druri, brenda të cilës efektivët kanë parë vrima në mure të shkaktuara me armë zjarri. Dyshohet se këto vrima mund të jenë bërë për të provuar armë të ndryshme.
Në momentin kur është ushtruar kontroll në banesën e Ervis Lamit, ky i fundit nuk u gjet në banesë, por derën e ka hapur një familjar i tij.
Për armët e gjetur në banesë, Policia arrestoi djalin e xhaxhait të Ervis Lamit, 37-vjeçarin Eduart Lami, pasi banesa përdorej nga të dy.
Lulzim Visha u vra mëngjesin e 24 Janarit teksa ka qenë duke shkuar për në punë në momentin kur është ekzekutuar rreth 200 metra larg banesë së tij, teksa makina që po drejtonte i përkiste kompanisë “Postman”, që dërgon pako në gjithë Shqipërinë.
Në vendin e ngjarjes u gjetën 12 gëzhoja, teksa dyshohet se autorët kanë përdorur një armë zjarri me silenciator, pasi banorët e zonës kanë deklaruar se nuk kanë dëgjuar të shtëna.
Disa orë pas ngjarjes, automjeti tip “Porsche” i përdorur nga autorët u gjet i djegur në fshatin Zgafnor, në Zall-Herr, teksa brenda makinës u gjet dhe një armë e gjatë zjarri, e cila dyshohet si arma e përdorur nga autorët në atentatin ndaj Lulzim Vishës. Makina e autorëve rezultonte e vjedhur në Elbasan.
Pista kryesore ku po heton Policia është ajo e konflikti që ai kishte patur pak kohë më parë me anëtarë të familjes Lami, po në fshatin Zall Mner, ku shkaku i konflikti dyshohet se kanë qenë motivet e pronësisë.
Discussion about this post