Disa ditë pasi Gjykata e Tiranës vendosi të dërgojë për gjykim dosjen ndaj Mario Përlleshajt për akuzën e vrasjes në rrethana të tjera cilësuese, Gjykata e Lartë ka caktuar datën për shqyrtimin e kërkesës së tij për ndryshimin e masës së sigurisë, e cila është arrest në burg.
I mituri është akuzuar si autori i vrasjes së bashkëmoshatarit të tij, Martin Cani, ngjarje që ndodhi më 18 nëntor të vitit të kaluar pranë shkollës “Fan Noli”.
Trupi gjykues, i përbërë nga Ilir Panda, Albana Boksi dhe Medi Bici, do të shqyrtojë kërkesën më 3 prill në orën 10:00, për të vendosur nëse do të pranojnë kërkesën e mbrojtjes për ndryshimin e masës së sigurisë, apo do të lënë në fuqi vendimet e shkallëve më të ulëta të gjyqësorit.
Avokatët e Mario Përlleshajt argumentojnë se nuk ekzistojnë dyshime të arsyeshme mbi fajësinë e tij, kontestojnë ekspertizën dhe rrethanat e ngjarjes, si dhe theksojnë nevojat specifike të tij për edukim dhe zhvillim, duke kërkuar që të merren parasysh nenet për mbrojtjen e të miturve dhe trajtimin e tyre në kuadër të Kodit të Drejtësisë Penale për të mitur.
Discussion about this post