Prokuroria ka bërë të mundur që të identifikojë nga pamjet filmike se ish-drejtorët e policisë së qarkut të Elbasanit, Albert Nushi dhe Niko Palla kanë qenë në vendngjarje kur është vrarë Pjerin Xhuvani. Sipas prokurrisë, drejtorët janë fshehur në makinë duke mos kryer asnjë veprim për parandalimin e vrasjes, kështu ata pritet që të merren në pyetje.
Një ditë më parë u raportua se pjesë e hetimit është bërë edhe Gazment Bardhi, deputeti i Partisë Demokratike. Prokurorët Ritvan Sukaj dhe Platin Aliçka kanë zgjeruar rrethin e personave që do të merren në pyetje, dhe shton se pritet që prokuroria të marrë në pyetje Bardhin, si personi kyç që ka dijeni për ngjarjen. Deputeti Gazment Bardhi asokohe ishte kryesuesi i listës së Elbasanit dhe sekretar i Përgjithshëm i Partisë Demokratike në kohën që drejtohej nga Basha.
Ngjarja e rëndë ndodhi më 21 prill të vitit 2021. SMV”-të e ngritura nga Gazment Bardhi e të njohura si Struktura për Mbrojtjen e Votës, që ishin caktuar për të mbrojtur votën u përplasën me një grup personash që sipas tyre po shpërndanin material zgjedhore. Përplasja fizike solli përdorimin e armëve e bilancin e rëndë, një të vdekur e katër të plagosur. Ishte Xhuvani ai që vdiq, ndërsa të plagosurit ishin Paulo Vuksani, Emiljano Prenga, Eltjon Bodinaku dhe Xhensila Sota. Nga dita e arrestimit deri më sot në pranga është ish-oficeri i RENEA-s, Arbër Paplekaj i cili akuzohet se qëlloi për vdekje Xhuvanin dhe dhëndrin e tij, Eltjon Bodinaku.
Discussion about this post