Është dhënë masa e arrestit për dy punonjësit e hotelit Daniel Qose 33 vjeç dhe David Lart 30 vjeç, të cilët ndihmuan për të fshehur provat për vrasjen e 31-vjeçarit Eraldo Nevruzi.
Ata eliminuan sendet personale, teshat, dhe çdo gjë tjetër që do ishte provë, duke i djegur në furrën e picave. 31-vjeçari Eraldo Nevruzi u ekzekutua nga dhëndri i pronarit Gerald Shehu 43 vjeç në hotel “Greccia” në Dhërmi.
Seanca gjyqësore është drejtuar nga gjyqtarë Dorina Stroka dhe prokurore Vijuna Mata, ndërkohë që gjykata është shprehur ,vlerësimin e ligjshëm të arrestit dhe masën e sigurisë arrest në burg. Të dy autorët kanë shprehur pendesë për veprimin që kanë bërë, duke thënë se kanë qenë nën kërcënimin e armës.
Si u ekzekutua recepsionisti në Dhërmi
31-vjeçari Eraldo Nevruzi është ekzekutuar në brendësi të një dhome hoteli në Dhërmi. Autori i dyshuar i kësaj ngjarje është identifikuar nga policia e Vlorës si 43-vjeçari Gerald Shehu.
Të dy personat kanë qenë në brendësi të hotelit “Greccia” në Dhërmi kur dyshohet se janë konfliktuar. Gerald Shehu ka nxjerrë armën dhe dyshohet se e ka goditur me një plumb në kokë. Më pas e ka mbështjellë trupin me çarçaf dhe e ka futur në brendësi të makinës së tij.
E gjithë ngjarja është filmuar nga kamerat e sigurisë së hotelit. 43-vjeçari më pas është larguar me automjetin tip Audi A8 në drejtim të Greqisë me targa angleze. Autori ka hedhur trupin e viktimës diku përgjatë itinerarit në drejtim të Greqisë dhe më pas është futur në territorin grek.
Policia ka marrë informacione nëpërmjet sistemit TIMS për lëvizjen e 43-vjeçarit dhe ka nisur kërkimet falë edhe bashkëpunimit më shtetin grek. Pas disa orëve nga ngjarja në fjalë është arrestuar në aeroportin e Korfuzit 43-vjeçari Shehu teksa kishte prerë biletat për të ikur në drejtim të Anglisë.
Automjeti i autorit është gjetur në lagjen Nr. 4 Sarandë. Pas arrestimit për autorin po punohet për ekstradimin e tij.
31-vjeçari Eraldo Nevruzi kishte një javë që kishte filluar punë në hotelin në fjalë.
Recepsionistja e cila ndërroi turnin me të një ditë më parë, Paola Spahiu tha se ishte “djalë i lëvizshëm teksa nuk di asgjë rreth ngjarjes.”
Sipas saj, një javë më parë Eraldo Nevruzi ka kërkuar punë duke filluar normalisht teksa nuk di çfarë lidhje ka patur me pronarin e hotelit.
Policia e Vlorës ka vazhduar përgjatë gjithë kohës kërkimet në zonën e Dhërmiut dhe Vunoit, por edhe përgjatë fshatrave të bregdetit. Gerald Shehu ishte dhëndri i pronarit të hotelit bashkëpronar në njësinë e biznesit.
Në automjetin e autorit nuk është gjendur arma e zjarrit.
Discussion about this post