Një person që dyshohet se ka siguruar kushtet për vrasjen e Renato Hoxhajt në Vlorë, është arrestuar në Tiranë. Burime bëjnë me dije se në Tiranë është ndaluar shtetasi me inicialet E. Mehmeti, i cili dyshohet se ka ndihmuar autorin e vrasjes për t’u larguar nga vendi i ngjarjes. Ai është me origjinë nga Tropoja dhe merret me shitje pronash, teksa njihet dhe si mik i Roan Brahimit alias Sidorel Prendit, i ekzekutuar në Maj të vitit të kaluar në Athinë.
Gjithashtu bëhet me dije se tropojani ia kishte dorëzuar autorit para krimit automjet të cilir i ishin ndërruar edhe targat. Mësohet se në cilësinë e provës materiale, të arrestuarit i është sekuestruar një celular, brenda të cilit janë gjetur të dhëna të vlefshme për hetimin, teksa dyshohet se vrasja është porositur nga një grup kriminal nga Emiratet e Bashkuara.
Po ashtu raportohet se viktima i druhej një sulmi pasi kishte shtuar masat e sigurisë në banesën e tij ku rreth dy muaj më parë kishte instaluar në çdo cep kamera sigurie, të cilat filmuan ngjarjen dhe makinën e autorit.
Ngjarja ka ndodhur rreth orës 06:00 më 27 prill kur viktima po kthehej në shtëpi nga vendi ku punonte si roje i një objekti në ndërtim. Hoxhaj është qëlluar nga afër tre herë me armë zjarri. Raportohet se ka qenë bashkëjetuesja e tij që ka dëgjuar të shtënat dhe e ka gjetur të vdekur.
Ajo ka shpërthyer në lot, duke thënë “e vranë mo e vranë”, ndërsa më pas është marrë në pyetje nga policia. Viktima ishte i divorcuar dhe bashkëjetonte me një grua, ndërsa raportohet se është baba i dy fëmijëve të rritur. Hoxhaj mori 2 plumba në kokë dhe dy në trup, ndërsa pistoleta ka qenë me gëzhoje 9 mm.
Në dëshminë e saj, bashkëjetuesja ka treguar vetëm se si e ka gjetur të vrarë dhe ka njoftuar policinë. Askush nga banorët nuk ka parë personat që kanë kryer krimin. Pistat kryesore të hetimit janë konfliktet e mundshme së fundmi dhe përfshirja në ndonjë ngjarje.
Discussion about this post