Gjykata e Apelit ka lënë në fuqi masën e sigurisë “arrest me burg” për Petrit Çakrri alias Hoxha dhe Fatjon Bushgjokaj, të akuzuar për vrasjen e 23-vjeçarit Renis Dobra, i cili u gjet i pajetë buzë liqenit të Shkopetit në korrik të këtij viti.
Renis Dobra u denoncua i zhdukur nga familjarët mbrëmjen e 8 Korrikut ndërsa u gjet i pajetë mëngjesin e ditës tjetër pranë liqenit të Shkopetit, në fshatin Madhesh.
Të shpallur në kërkim për këtë ngjarje janë dhe Aleksandër Bushgjokaj dhe Kristë alias Kristi Bushgjokaj (vëllezër të Fatjon Bushgjokajt), të dyshuar si autorët kryesorë të përfshirë në rrëmbimin, torturimin dhe vrasjen e Dobrës.
Shkaku i vrasjes lidhet me tregtinë e kokainës në Gjermani, ku Renis Dobra kishte qenë më parë i arrestuar dhe dënuar nga drejtësia e këtij vendi.
Sipas informacioneve të mbledhura nga policia e Dibrës, ai dyshohet se vite më parë punonte si shpërndarës droge në Gjermani, për llogari të një grupi kriminal që drejtohej nga 3 vëllezërit Bushgjokaj nga Tropoja.
Në disa raste, Dobra nuk kishte dorëzuar shumat e fituara nga shitja e drogës, duke pretenduar se lëndën narkotike e kishte hedhur në rrugë apo liqen, për arsye se po e ndiqte policia. Kjo ka ngritur dyshime tek vëllezërit Bushgjokaj, të cilët kanë besuar se ai i kishte mashtruar dhe vjedhur paratë e tyre.
Discussion about this post