Hetimet lidhur me zhdukjen e më pas vrasjen e biznesmenit Ruzhdi Hoxha në Tiranë vijojnë, ndërsa në fokus është e shkuara e dy autorëve kryesorë të dyshuar për këtë vrasje, vëllezërit Rrushi.
Provat e deritanishme lidhur me arrestimin e tyre për këtë ngjarje, duket se janë të pamjaftueshme për të faktuar krimin e rëndë. Ndërsa së fundmi ekspertët e hetimit kanë zbuluar se Ferdinand Rrushi veç akuzës së rrëmbimit dhe vrasjes së Ruzhdi Hoxhës, si dhe kultivimit të një parcele me drogë, po hetohet edhe për aktivitetin e dhënies me fajde të parave.
Këto dyshime ndaj tij dhe të vëllait Pajtim Rrushi janë ngritur mbas rrëmbimit të Hoxhës, trupi i të cilit u gjet i pajetë në qafë Mollë.
Pritet që prokuroria të sekuestrojë pasuritë e të dy të akuzuarve dhe familjarëve të tyre, nën dyshimin se disa prej tyre e kanë origjinën nga aktiviteti i fajdeve dhe kanë origjinë të dyshimtë. Përveç tre pasurive tokë arë, deri më tani janë gjetur në pronësi të tyre edhe katër automjete Land Rover, Deimler Craisler.
Vrasja e Ruzhdi Hoxhës
Dy autorët e akuzuar për vrasjen e më pas fshehjen e trupit mes gurëve dhe zhavorrit në Dajt, kanë vendosur të mos tregojnë asgjë për ngjarjen. Megjithatë hetimet kanë zbardhur provat të cilat ngrejnë dyshimet se ata kanë bashkëpunuar për ekzekutimin e biznesmenit Ruzhdi Hoxha. Burime për gijotina.com bëjnë me dije se vëllai i Ferdinantit ka luajtur rolin e bashkëpunëtorit në krim , pasi është përpjekur të fshehë gjurmët e krimit, duke fshehur makinën e Fredi Rrushit, që policia të mos mblidhte gjurmët e ADN-së. Kjo lëvizje është faktuar nga pamjet e kamerave të sigurisë. Ndërsa Pajtimi nuk ka treguar asgjë për këto pamje dhe ka mohuar të ketë pasur dijeni për vrasjen.
Burime nga grupet hetimore për gijotina.com gjithashtu bëjnë me dije se nga ora 3 e mëngjesit që ka bërë ekzekutimin Fredi Rrushi ka marrë viktimën e ka vrarë direkt sipas dyshimeve dhe më pas i ka marrë celularin dhe e ka zbritur poshtë pranë shkollës së bashkuar dhe e ka hedhur në tokë.
Më pas celulari është gjetur nga një taksist i cili ka vajtur dhe e ka shitur në një pikë për tregtimin e celularëve. Pronari i servisit të celularëve e ka ndezur dhe e ka përdorur për punën e tij, organi i akuzës e ka gjurmuar celularin dhe ka shkuar dhe e ka gjetur më pas duke marrë dëshminë.
Discussion about this post