Shkëlzen Velaj, i cili u ekzekutua me 15 plumba në derën e shtëpisë orët e para të 3 qershorit, mund të jetë eliminuar nga një person i vetëm. Më pas, mësohet se autori është ndihmuar nga persona të tjerë për t’u larguar nga vendi i ngjarjes.
Ngjarja e rëndë ndodhi në lagjen 24 Maji në Vlorë duke tronditur banorët të cilët thanë për mediat që ai dhe nëna e tij gëzonin respekt të plotë në lagje.
Mbi Velajn u qëllua të paktën 15 herë dhe plumbat i prekën pjesën e barkut. Altin alias Shkëlzen Velaj është një prej 7 të arrestuarve nga blutë e Vlorës në Tetor të 2019 gjatë operacionit të koduar “Vjeshta” , për kultivim të lëndëve narkotike.
35-vjeçarit, 6 vjet më parë i kishin vrarë dhe vëllain e tij Ardi Velaj, në të ashtuquajturën “masakra e Çoles”, ku humbën jetën dhe dy të rinj të tjerë.
Paralelisht me hetimet, RENEA dhe Forcat e Ndërhyrjes së Shpejtë kanë kryer disa kontrolle në Selenicë dhe Vlorë, por deri tani nuk kanë pasur asnjë rezultat.
