Zbardhet atentati në Shkodër/ Kush janë vëllezërit e arrestuar dhe konflikti që çoi në vrasje (VIDEO-FOTO)

Pamjet e një kamere sigurie kanë fiksuar mëngjesin e së dielës teksa lëviz me biçikletë, 29-vjeçarin Arjon Hasaj, tashmë i arrestuar nga policia e Shkodrës për vrasjen e 33-vjeçarit Ramazan Mataj. Ky i fundit u gjet i ekzekutuar me armë zjarri brenda makinës së tij në fshatin në Dragoç, jo larg banesës ku jetonte, mëngjesin e më 5 Janarit.

Arjon Hasaj akuzohet si qitësi që derdhi breshërinë e plumbave ndaj Matajt, ndërsa në pranga është vënë edhe vëllai i tij Klisman Hasaj, i akuzuar si bashkëpunëtor në krim.

Sipas policisë, konflikti mes palaëve lindi pasi “Ramazan Mataj kishte ndikuar për prishjen e marrëdhënieve bashkëshortore të motrës së autorit”.

Ndaj Arjon Hasaj është ngritur akuza për veprat penale “Vrasja me paramendim” dhe “Prodhimi dhe mbajtja pa leje e armëve, armëve shpërthyese dhe municionit luftarak”.

Ndërsa Klisman Hasaj akuzohet për veprën penale “Sigurimi i kushteve dhe mjeteve materiale për të kryer vrasje”.

Video e publikuar nga Policia

Hetimet

Rezultatet e hetimeve që çuan në zbardhjen e ngjarjes i njoftuan në një konferencë për mediat kreu i Drejtorisë Vendore të Policisë së Shkodrës Fatmir Lleshaj, së bashku me zëvendësdrejtorin për Hetimin e Krimit Ledio Ibrahimi dhe prokurorin e rrethit Albert Murçaj.

Lleshaj deklaroi se nga hetimet rezultoi se Arjon Hasaj, 29 vjeç, banues në Dragoç, për motive të dobëta, ka organizuar dhe ka kryer vrasjen e Ramazan Matajt.

“29-vjeçari, nëpërmjet llogarive të rreme në rrjete sociale, ka komunikuar me shtetasin Ramazan Mataj, për ta nxjerrë në pritë në fshatin Dragoç, ku dhe dyshohet se e ka vrarë”, shtoi ai.

Gjithashtu, nga hetimet dyshohet se Ramazan Mataj “kishte ndikuar për prishjen e marrëdhënieve bashkëshortore të motrës së autorit”, saktësi kryepolici i Shkodrës.

Hetimet kanë zbuluar se autori i dyshuar është ndihmuar nga vëllai i tij, Klisman Hasaj, për sigurimin e kushteve për të kryer vrasjen dhe për të fshehur armën e krimit.

Arma e krimit është sekuestruar nga grupi hetimor. Sipas bluve, pas vrasjes, dy vëllezërit e fshehën armën në një zonë të pyllëzuar dhe më pas e groposën në tokë në oborrin e banesës.