Policia vijon hetimet intensive për zbardhjen e vrasjes me eksploziv të 58-vjeçarit Isuf Jaçaj, i cili humbi jetën dy ditë më parë në rrethana ende të paqarta. Deri më tani, hetuesit po ndjekin dy pista kryesore që mund të çojnë në identifikimin e autorëve dhe zbardhjen e motivit të krimit.
Pista kryesore lidhet me një akt hakmarrjeje, e cila dyshohet se ka lidhje me atentatin e ndodhur më 17 korrik ndaj Gëzim Hajdarajt (33 vjeç) dhe Ernest Lamës (24 vjeç), të dy banues në Kamëz. Në atë ngjarje, Hajdaraj dhe Lama mbetën të plagosur.
Sipas burimeve hetimore, djali i viktimës, Klaus Jaçaj, dyshohet se ka ndihmuar autorët e atij atentati, vëllezërit Ramadan Zoto (i njohur edhe si Canaj) dhe Erjon Zoto, çka ka ngritur dyshimet se vrasja e Isuf Jaçajt mund të jetë një veprim hakmarrës i lidhur me konfliktin mes grupeve kriminale.
Pista e dytë që po shqyrtohet nga hetuesit ka të bëjë me të kaluarën e vetë viktimës. Isuf Jaçaj, sipas burimeve nga policia, rezulton të ketë qenë më herët i përfshirë në trafikun e lëndëve narkotike, dhe nuk përjashtohet mundësia që vrasja të ketë ardhur si pasojë e ndonjë konflikti të vjetër në këtë drejtim.
Ekspertët e policisë kanë sekuestruar kamerat e sigurisë në zonë dhe po analizojnë të dhënat telefonike të personave të lidhur me viktimën për të zbardhur më tej motivet dhe autorët e ngjarjes.
Discussion about this post