Policia e Shtetit ka vendosur 30 mijë euro shpërblim për çdo informacion që çon në identifikimin e autorëve të ngjarjes së rëndë të ndodhur 1 javë më parë në Vlorë, ku me snajper u ekzekutua 23-vjeçari Gëzim Sinomati.
Duket se pas pothuajse 1 javë hetimesh, Policia kërkon ndihmën e qytetarëve, duke vendosur një vlerë shpërblimi, ndër më të lartat të aplikuara në Shqipëri, për zbardhjen e ngjarjes.
“Ndërsa kanë kaluar disa ditë nga ekzekutimi me snajper në ballkonin e banesë së tij, policia e Vlorës kërkon ndihmën e qytetarëve për identifikimin e autorëve të atentatit ndaj Gëzim Sinomatit.
Në një njoftim zyrtar, policia bën me dije se grupi i posaçëm hetimor vijon veprimet e thelluara dhe kontrollet e pandërprera për zbardhjen dhe dokumentimin e saj.
“Në këtë kuadër, DVP Vlorë fton qytetarët që të japin informacion për këtë ngjarje dhe ofron shpërblimin 30 000 euro, për çdo informacion të vlefshëm që do të çojë në identifikimin dhe kapjen e autorëve. Drejtoria Vendore e Policisë Vlorë vë në dispozicion të qytetarëve, numrin e telefonit 0694173022, duke garantuar anonimatin e plotë të çdo telefonuesi”, thuhet në njoftimin e policisë.
Vrasja e 23-vjeçarit ndodhi më 07.01.2024, në lagjen “Hajro Çakërri”. Viktima ishte kthyer vetëm pak ditë para ngjarjes nga Belgjika për të festuar Vitin e Ri pranë familjes. Ai u qëllua me snajper nga persona ende të paidentifikuar, duke ndërruar jetë në vend.
Autorët u larguan nga vendi i ngjarjes, ndihmuar edhe nga errësira, dhe dogjën automjetin tip “BMW” me të cilin dyshohet se kryen krimin. Automjeti u gjet nga policia duke u djegur në lagjen “24 Maji”.
Viktima është djali i Sokol Sinomati i cili njihet me nofkën “buzëderri”.
Discussion about this post