Eksperti i kriminalistikës, Ervin Karamuço, i ftuar në Top Tak, për atentatin në Vlorë, ku mbeti i vrarë Gëzim Sinomataj, e cilësoi autorin si pjesë të një grupi kriminal të rrezikshëm.
Sipas tij, “nuk përjashtohet mundësia që qitësi të ketë qenë një i huaj, që ka ardhur nga jashtë për të kryer porosinë.”
Karamuço ngriti problematikën e kamerave të sigurisë.
“Kamerat që gjejnë në kohë reale targat e makinave akoma nuk janë aplikuar në Shqipëri. Ka një motiv të freskët për kryerjen e këtij aktiviteti, nuk bëhet fjalë për histori të vjetra. Nuk do zgjidhi asgjë Policia e Shtetit”, tha eksperti.
Gazetarja Dorjana Bezat e kundërshtoi, duke thënë se kamera ka por nuk mirëmbahen.
“Ka kamera sigurie, por problemi qëndron që policia nuk paguan për mirëmbajtjen e tyre”, tha Bezat.
“Kamerat janë vendosur nga qytetarë të zonës, për të marrë informacione për çdo automjet që hyn e del nga Vlora. Kjo duhet të zgjojë nga gjumi Policinë e Shtetit. Nuk mund të bëjnë xhiro poshtë e lartë, e të harxhojnë karburant. Sot ka teknologji”, tha Karamuço.
Ai foli gjithashtu për blindimin e qytetit, për të cilin tha se Policia zbarkon në qytet pasi ndodh ngjarja, ndërkohë që e dinë që në Vlorë ka 5 grupe kriminale.
“Policia e Shtetit organizohet në mënyrë ndëshkuese. Pasi ndodh një ngjarje në territorin tonë vendosen patrulla policie, si macja me miun. Ta lenë atë detyrë ata të Policisë së Shtetit, ka njerëz të tjerë që dinë ta bëjnë më mirë”, tha eksperti.
Ai tregon se në Vlorë ka pesë grupe kriminale, për të cilët policia ka dijeni, por nuk i ka nën kontroll.
“Vlora ka 5 grupe kriminale, me probleme të mëdha në trafikim të armëve, të drogës, të qenieve njerëzore etj.. Këto i di policia, ka dokumente pafund. Këta të mbahen nën vëzhgim, policia e di që priten shumë atentate të tjera në Vlorë”, u shpreh Ervin Karamuço. /TCH/
Discussion about this post