Policia e Elbasanit ka dhënë informacion zyrtar në lidhje me ngjarjen e ndodhur dje në burgun e Peqinit. Në një deklaratë për mediat konfirmohet ndalimi i 12 zyrtarëve të burgut, nën akuzën e shpërdorimit të detyrës, mes tyre drejtori i këtij institucioni, Kamber Hoxha si dhe punonjës të policisë.
Kujtojmë se Sokol Mjacaj qëlloi dje për vdekje Arben Lleshin dhe plagosi Indrit Shaqjan.
Njoftimi i policisë
Në lidhje me ngjarjen e ndodhur dje, në IEVP Peqin, ku shtetasi Sokol Mjaçaj vrau me armë zjarri, shtetasin Arben Lleshi, plagosi shtetasin Indrit Shaqja (të tre këta shtetas vuanin dënimin me burgim të përjetshëm në IEVP Peqin), i cili është aktualisht në kujdesin e mjekëve, si dhe kanosi me këtë armë, punonjësit e shërbimit në këtë IEVP, ju informojmë se:
Nga oficerët e Policisë Gjyqësore të Drejtorisë Vendore të Policisë Elbasan u ekzekutua urdhri i prokurorit, për kryerjen e arrestimit në flagrancë për veprat penale “Vrasja në rrethana të tjera cilësuese”, “Mbajtja pa leje dhe prodhimi i armëve, armëve shpërthyese dhe i municionit” dhe “Futja ose mbajtja e sendeve të ndaluara në institucionin e ekzekutimit të vendimeve me burgim”, të shtetasit Sokol Mjaçaj, 28 vjeç.
Gjithashtu, specialistët për Hetimin e Krimeve kundër Personit, në bashkëpunim me ata të Shërbimit të Kontrollit të Brendshëm të Sistemit të Burgjeve, ekzekutuan urdhrin e prokurorit, për ndalimin për veprën penale “Shpërdorimi i detyrës”, të shtetasve:
-Kamber Hoxha, drejtor i burgut Peqi
Qani Muça, shefi i policisë së burgut
Nikolin Gjonpalaj, ish shefi i policisë së burgut
Vilson Shima, shef i regjimit të burgut
Arben Dulellari, specialist informacioni
Fatos Pire, polic shërbimi i IEVP Peqin
Ilir Balla, polic shërbimi i IEVP Peqin
Florenc Mile, polic shërbimi i IEVP Peqin
Genci Muça, punonjës policie i IEVP Peqin
Indrit Dubali, punonjës policie i IEVP Peqin
Klement Haka, punonjës policie i IEVP Peq
Erjon Çela, punonjës policie i IEVP Peqin
Në vijim të veprimeve procedurale u sekuestrua arma e zjarrit e përdorur në ngjarje, si dhe prova të tjera materiale që do t’i shërbejnë hetimit.
Në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Elbasan, vijojnë hetime intensive për të individualizuar përgjegjësinë penale të shtetasve të ndaluar, si dhe për të zbardhur dhe dokumentuar ligjërisht rrethanat e kësaj ngjarjeje.
Materialet procedurale i kaluan Prokurorisë, për veprime të mëtejshme.
Discussion about this post