Vrasja në Elbasan, sherri me thika nisi për një vajzë

Ardit Hida është 24 vjeçari që vrau me thikë Florenc Kovaçin dhe plagosi rëndë të vëllain Mikele Kovaçi mbrëmjen e djeshme në qytetin e Elbasanit.

Ngjarja e rëndë ndodhi për motive të dobëta dhe sipas burimeve ky sherr ka nisur për një femër dhe më pas ka degjeneruar në përdorimin e armës së ftohtë (thikë) që i mori jetën 28 vjeçarit, Florenc Kovaçi.

Po sipas burimeve, viktima vuante nga probleme të shëndetit mendor. I vëllai është plagosur rëndë dhe është transportuar në spitalin e Traumës në Tiranë.
PO SI NDODHI NGJARJA?
Ka qenë ora rreth 19 e 50 minuta, kur dy vëllezërit, përkatësisht Florenc dhe Mikel Kovaçi, janë konfliktuar me një grup të rinjsh, konflikt i cili dyshohet se ka ndodhur për shkak të një femre.
Ata kanë debatuar fillimisht me fjalë dhe më pas janë përdorur armë të ftohta. Për pasojë, ka humbur jetën Florenc Kovaçi, 28 vjeç, ndërsa ka mbetur i plagosur rëndë vëllai i tij, Mikel Kovaçi, 19 vjeç. Ky i fundit është dërguar me urgjencë drejt Spitalit të Traumës në Tiranë, ku ndodhet në gjendje të rënduar shëndetësore.
“Më datë 05.11.2021, rreth orës 19:50, në lagjen ‘Qemal Stafa’, Elbasan, pas një konflikti për motive të dobëta mes dy vëllezërve dhe disa personave të tjerë, konflikti është përshkallëzuar dhe për pasojë dy vëllezërit janë plagosur me mjet prerës thikë. Si pasojë e plagëve të marra, njëri prej vëllezërve, shtetasi F.K., rreth 28 vjeç, banues në Elbasan, ka ndërruar jetë ndërsa vëllai tjetër shtetasi M.K., 19 vjeç, ndodhet në spital për ndihmë mjekësore”, sqaroi Policia e Elbasanit.
VIKTIMA
I riu Florenc Kovaçi ka përfunduar i pajetë në Spitalin e Elbasanit. Ai është goditur disa herë me thikë në pjesën e kraharorit dhe në zemër, plagë të cilat kanë qenë fatale për të. Burimet bënë me dije gjithashtu se viktima vuante nga probleme të shëndetit mendor dhe kurohej prej disa vitesh. Ai gjithashtu njihej si person konfliktual në zonë.
AUTORI
Menjëherë pas ngjarjes së rëndë, forca të shumta policie shkuan në vendin e ngjarjes. Forcat e Rendit nisën krehjen e zonës, duke çuar pas rreth dy orësh në pranga një 24- vjeçar si autor të dyshuar të ngjarjes së rëndë. I riu, i cili banon jo shumë larg banesës së viktimës, ka pranuar krimin përpara Forcave të Rendit. Policia ka sekuestruar gjithashtu edhe armën e krimit (thikë). Grupi hetimor po punon për zbardhjen e plotë të rrethanave të ngjarjes. Ndërkohë janë marrë në pyetje edhe familjarët e viktimës dhe autorit, ndërsa bëhet me dije se nuk dinin që të rinjtë kishin konflikt më herët.