Zbardhen detaje të reja tronditëse nga ngjarja e rëndë në Gjykatën e Apelit të Juridiksionit të Përgjithshëm në Tiranë, ku gjyqtari Astrit Kalaja u ekzekutua me armë zjarri brenda sallës së gjyqit.
Burime zyrtare bëjnë me dije se autori i krimit, Elvis Shkambi, ka hyrë në ambientet e gjykatës i armatosur, pa u pikasur nga kontrolli i sigurisë. Detektori metalik që duhej të zbulonte armët, ka qenë jashtë funksioni prej më shumë se një muaji, fakt që ishte i njohur edhe për publikun dhe personelin e gjykatës.
Për pasojë, kontrolli i vizitorëve kryhej vetëm fizikisht nga dy oficerë sigurie, të cilët duket se nuk kanë arritur të konstatojnë armën që mbante me vete 30-vjeçari.
Megjithatë, rrethanat se si arriti autori të fuste armën brenda në sallën e gjyqit, pa u kontrolluar në mënyrë efektive, mbeten ende mister dhe janë në qendër të hetimeve të thelluara që po zhvillohen nga Policia e Shtetit dhe Prokuroria.
Ngjarja ka ngritur pikëpyetje të forta mbi masat e sigurisë në ambientet e institucioneve të drejtësisë dhe ka rikthyer urgjencën për rritjen e standardeve të mbrojtjes për gjyqtarët, prokurorët dhe qytetarët që frekuentojnë gjykatat.
Autoritetet janë vënë nën presion publik për të dhënë përgjigje konkrete se si dështuan sistemet e sigurisë dhe pse një element bazë si detektori metalik ka qëndruar i prishur për kaq kohë, duke ekspozuar një rrezik të madh në zemër të sistemit të drejtësisë.
Discussion about this post