Gjykata ka lënë në burg, Leonard Bashaliu autorin e vrasjes në Peqin. Bashaliu ekzekutoi me armë zjarri 45-vjeçarin Ylber Xhahysa në fshatin Gjocaj.
“Nuk do ta kisha vrarë por më ka dhunuar dhe fyer”.
Kështu ka deklaruar para Gjykates ku ka dalë për të rivlerësuar masën e sigurisë, Leonard Bashaliu i cili akuzohet se qëlloi me armë zjarri duke e lënë të vdekur 44-vjeçarin Ylber Xhahysa, në Peqin.
Bashaliu përfundoi në prangat e policisë fill pas ngjarjes së rëndë të ndodhur në fshatin Gjocaj të Peqinit.
Pas konfliktit verbal Leonardi qëlloi me pistoletë në drejtim të Ylberit, duke e lënë këtë të fundit fillimisht të plagosur. Mandej 44-vjeçari u dërgua në spital, por nuk mundi t’u mbijetojë plagëve të marra.
E kaluara e autorit dhe viktimës
Në njoftimin e Policisë thuhet se ngjarja ka ndodhur për motive banale. Megjithatë, zbardhen të tjera detaje mbi të kaluarën e autorit të dyshuar dhe viktimës.
Mësohet se mes tyre ka pasur një konflikt të hershëm që e ka zanafillën 5 vite më parë, kohë kur autori i dyshuar është konfliktuar me viktimën pasi ky i fundit i kishte gërvishtur automjetin. Po ashtu Leonard Bashaliun e shqetësonte fakti që Ylber Xhahysa hiqej si i “forti” i fshatit.
Dyshohet se Bashaliu ka qëlluar me armë zjarri pistoletë në drejtim të Xhahysës, i cili ndonëse u dërgua nga të afërmit në spital, nuk u mbijetoi plagëve të marra.
“Panorama” mëson po ashtu se autori i dyshuar është shfaqur i rënduar psikologjikisht pas krimit.
Ai ka thënë në deklarimin e parë pas arrestimit se “u zumë kot pasi para 5 vjetësh me ka qëlluar me grusht dhe sot filloi debati me fjalë e përfundoi me përdorimin e armës së zjarrit”.
I ndjeri, baba i dy fëmijëve, ishte pronar i një Kabllori për transmetime televizive në zonë.
