Tre ditë pas vrasjes së Egli Progës ka ardhur edhe reagimi i parë nga familjarët e të ndjerit. Ato ngrenë akuza të shumta, teksa shprehen se pjesëtari i familjes së tyre është gjetur me shenja të mëdha dhune.
Motra e 42-vjeçarit, Jonida Proga mes lotësh rrëfen si e mësoi lajmin për të vëllanë. Ajo deklaron se vëllanë e saj e vranë, ndërsa akuzon policinë se ka vepruar me vonesë.
“Më ka marrë djali tezes në telefon dhe më tha urgjent në spital. Vrapoj për atje, futem te urgjenca, shoh Eglin të shtrirë, të masakruar. Mjekët ishin duke i dhënë ndihmën e fundit, ne se pranonim dot që kishte ndodhur derisa mjekët thanë që ti hiqnin pajisjet. Në shok kam dalë jashtë, pyes policët çfarë ka ndodhur dhe më thonë është rrëzuar. Kanë folur për pjesën që është rrëzuar e deri që nuk e dimë, por jo të thoshin kemi lëshuar njerëz, po mbledhim prova, po marrim kamerat, po pyesim dëshmitarë. Policia ka lëvizur shumë vonë. Do të thotë që kanë qenë në lëvizje nga të tjerët për tu sjellë kështu. Akoma asnjë gjë, informacioni vetëm është marrë nga mediat. Mirë që si lexova që ka vdekur në gjendje të dehur nga rrëzimi, se nuk e di si do ta përballoja”, tha ajo.
Jonida Proga shprehet se vëllai i saj është vrarë e masakruar dhe është lënë në rrugë. Ajo shprehet se vëllai i saj ishte njeri i paqtë dhe familjarë. Jonida Proga thekson se ambulanca është vonuar dhe se vëllai i saj mund të ishte gjallë nëse do ishte vepruar më shpejt.
“Dallohej qartazi që ishte dhunuar, por nuk thuhej nga askush që ishte i dhunuar. E kanë vrarë, e kanë masakruar në mes të rrugës në tufë, e kanë braktisur, e kanë lënë. Ambulanca nuk vinte, u vonua gjysmë ore që Pogradeci për 2 minuta arrin. Policia nuk pranonte të lëvizte trupin pa ardhur ambulanca, mund të ishte gjallë aty, mund ta shpëtonin.
Egli ishte njeriu më i butë, më i dashur, e donin të gjithë, ishte familjar, ishte në punën e tij. Sa ka mbyllur punën, ishte në qejf, nuk e di çka ndodhur. E kanë kthyer, e kanë provokuar, dhe më pas e kanë vrarë. Është vrasje në bashkëpunim, s’është vetëm një njeri, këtu është në bashkëpunim dhe shteti që ka pritur, e ka fshehur ngjarjen. Nuk ka patur shirita, makinat kalonin aty, njerëzit pinin kafe.
Kjo është vrasje nga të gjitha anët, me gjakftohtësinë më të madhe, nuk është një vrasës, kjo gjë sapo ka filluar dhe mos guxojë askush të bëhet palë. Kushdo që ka guxuar mos të guxojë më”, theksoi ajo.
Jonida Proga kërkoi hetim në detaje e zbardhjen e ngjarjes, ndërsa u bëri thirrje organeve të drejtësisë që të vënë përpara drejtësisë autorët.
“Të hetohet çdo gjë në detaje, çdo gjë që ka ndodhur, çdo gjë që është bërë në bashkëpunim, çdo frymë që ka kaluar atje, çdokush që e ka parë, gjithë plehrat që janë fshehur, çdo kafshë që ka guxuar të jetë atje e ka frikë e fshihet. Si thonë që nuk kemi parë gjë kur shohin të masakrohet një njeri i pambrojtur? Kush është i forti këtu kur goditet i pambrojturi?“, përfundoi Jonida Proga, motra e të ndjerit Egli Proga.
Discussion about this post