Gjykata e Korçës ka lënë në burg Denis Meçen si i dyshuar për vrasjen e Egli Progës, ndërsa për 3 të arrestuarit e tjerë Voltan Shulku, Arian Manellari e Leonidha Guçe ka vendosur detyrim paraqitje. Këta të fundit akuzohen për moskallëzim krimi dhe veprime që pengojnë zbulimin e së vërtetës, ndërsa Meçe për veprën penale vrasje nga pakujdesia.
Ka qenë prokuroria Vasjana Postol e cila pasi ka sqaruar gjithë dinamikën e ngjarjes me pasojë vdekjen e 42-vjeçarit Egli Proga, i ka kërkuar gjykatës lënien në burg të autorit Denis Meçe si dhe tre personave të tjerë të arrestuar.
Nisur nga provat paraprake të paraqitura nga akuza, gjykata ka marrë parasysh kërkesën e prokurores së çështjes për Denis Meçen, ndërkohë që për 3 personat e tjerë nuk ka bërë një gjë të tillë duke pranuar kërkesat e avokatëve për masën e sigurisë detyrim paraqitje.
Denis Meçe akuzohet për vrasje me dashje vetëm tre ditë më parë në qytetin e Pogradecit, pas një sherri që ka pasur në afërsi të një lokali me 42-vjeçarin Egli Proga.
Ngjarja për gjobëvënie
Sipas raportimeve mediatike, vrasja ka ndodhur pasi viktima ka refuzuar ti paguante një gjobë autorit Denis Meçe.
Sipas TCH: Ishte pasditja e 11 gushtit kur Egli Proga mbylli qepenin e lokalit të tij në Pogradec për herë të fundit dhe u drejtua për në shtëpi. Pak metra më tej, në afërsi të një lokali tjetër ishte Denis Meçe dhe e ftoi Eglin për një cigare. Ai i ka kërkuar xhiron ditore 42-vjeçarit si “gjobvënie”, por ky i fundit ka refuzuar.
Dëshmitarët okularë kanë treguar se në ato momente, Egli është shprehur se nuk mund t’i jepte xhiron ditore, pasi kishte për të mbajtur fëmijët e tij. Xhiroja ditore i kushtoi jetën Eglit, pasi u godit me grushte në anën e majtë të kokës nga Denis Meçe, goditje e cila ishte fatale. Ai ra në tokë dhe qëndroi i shtrirë për 30 minuta, tregojnë dëshmitarët nga vendi i ngjarjes, ndërsa aty pranë ishte edhe një efektiv policie. Familjarët kanë tentuar ta marrin 42-vjeçarin dhe ta dërgojnë në spital, por janë refuzuar dhe iu është thënë nga policia se ndihma mund të jepet vetëm nga persona të specializuar, por ambulanca erdhi me vonesë sipas tyre.
Dyshimet për manipulim të ngjarjes
Ngjarja tragjike është shoqëruar me akuza për manipulim të fakteve në favor të autorit.
Jonida Proga, motra e viktimës, tha para mediave se vëllai u dhunua dhe u la gjatë në rrugë në gjendje të rëndë, ndihma mjekësore u vonua ndërsa theksoi se “policia ka lëvizur shumë vonë” dhe se “jeta e vëllait mund të ishte shpëtuar me një ndërhyrje më të shpejtë mjekësore, gjë që u frenua nga veprimet policore”.
Avokati i Popullit ka nisur një verifikim të plotë mbi veprimet e organeve kompetente, i cili do të hedhë dritë mbi të gjitha aspektet e ngjarjes, përfshirë edhe pretendimet për moszbardhjen e drejtë të situatës.
Drejtori i përgjithshëm i policisë së shtetit Muhamet Rrumbullaku urdhëroi dje që të kryhet një inspektim lidhur me ngjarjen tragjike të Pogradecit në policinë e Korçës nga drejtoria e standardeve profesionale në policinë e shtetit.
Kryetari i Partisë Demokratike në Pogradec, Gentian Çela, deklaroi se “i ndjeri Egli Proga ndërroi jetë pas dhunës barbare të shkaktuar nga Denis Meçe, familjar i një drejtuesi të Partisë Socialiste, i njohur për bëmat në korrupsion dhe përfitues tenderash në Bashkinë e Pogradecit”.
Ai theksoi se policia e Pogradecit “për qëllime politike” u përpoq të “fshihte vrasjen e ndodhur në zonën më të populluar të qytetit duke e raportuar si vdekje natyrale”, si dhe kërkoi për këtë shkarkimin e drejtuesit vendor të policisë.
Eglantin Proga, baba i dy fëmijëve të mitur, njihej nga komuniteti si qytetar i rregullt e i qetë pa konflikte me persona problematikë.
Lexo edhe:
Motra e viktimës pas masave të sigurisë për vrasjen e Egli Progës: Janë lënë të lirë vrasës
Discussion about this post