Policia e Shtetit po vijon punën për zbardhjen e vrasjes se Martin Bardhit dhe plagosjes së 3 personave të tjerë, një ditë më parë në qytetin e Rrëshenit.
Burimet i thanë Ora News se automjeti tip “Jeep” i përdorur nga autorët ka qenë pa targa, ç’ka e bën të vështirë punën e policisë për gjurmimin e tyre. As në makinën e djegur deri në këtë moment nuk është arritur të përftohen gjurmë daltiloskopike.
Nga ana tjetër krahas shpalljes në kërkim policor të Saimir Reçit policia ka nisur edhe marrjen në pyetje të personave që kanë qenë në lokal. Disa prej tyre nuk kanë dhënë deklarime bindëse duke u shprehur se gjithçka ndodhi shumë shpejt dhe se nuk kanë parë gjë.
Një kamer sigurie e fiksuar në lokal që ndodhej sipër tavolinës është shpresë për hetuesit. Pas vrasjes, autorëve iu është dashur më pak se 10 minuta për të shkuar në fshatin Gëziq ku kanë djegur makinën.
Nga aty, ata kanë lëvizur në këmbë deri në autostradë kur besohet se i ka pritur një makinë tjetër.
Sipas policisë, nisur nga dinamika kemi të bëjmë me autorë amator.
Një tjetër detaj interesant është fakti se kur janë regjistruar të shtënat më armë zjarri, një punonjës policie i komisariatit të Rrëshenit ka dalë me armë në dorë, por e ka pasur të pamundur për t’i identifikuar pasi kanë lëvizur shpejt.
Hetuesit e kësaj ngjarje i thanë Ora News se vëllai i Martin Bardhit, Pjetri ka qënë i përfshirë në një ngjarje shumë kohë më parë. Në atë kohë ai ishte ushtarak ku dyshohet se ka vrarë një të fisit Reçi.
Discussion about this post