Ismet Çekorja, që u vra sot në Shkodër është babai i 24-vjeçarit Bajram Çekorja, i cili është shpallur në kërkim nga policia për atentatin me 19 plumba ndaj Alban Bruçit mbrëmjen e 25 gushtit në Shkodër. 4 ditë më parë viktima mohoi kategorikisht që i biri të jetë i përfshirë në atë ngjarje si dhe në vrasje të tjera mafioze që kanë tronditur prej vitesh Shkodrën.
Për mediat, ai tregoi se policia e ka shqetësuar shpesh familjen e tij duke i marrë në pyetje për vrasjet e Arjan Ferracakut, Fatos Ferracakut, Astrit Bilalit, Ibrahim Bilalit, plagosjen e Admir Bajrit dhe shefit të Policisë së Malësisë së Madhe, Mentor Hasanaj. Lidhur me sulmin e armatosur ndaj 25-vjeçarit Alban Bruçit, Ismet Çekorja këmbënguli se është e pavërtetë që djali i tij, Bajrami të ketë marrë pjesë, pasi ai është mik me të atin e Albanit. Ismeti këmbëngul se natën e krimit, i biri nuk ka qenë në vendngjarje dhe pretendon se kjo vërtetohet nga kamerat e sigurisë.
“Rasti i fundit është me Alban Bruçin, djalin e Lad Bruçit të cilin unë e kam shumë mik dhe nuk ka asnjë shans që djali im të qëllojë djalin e tij kur ne kemi shumë miqësi aq më tepër që Bajrami, djali im është i monitoruar me kamera. Këto sulme ndaj familjes tonë i bëjnë disa bandit, hajdutë biçikletash dhe banditë të veshur me pushtet. Se cila është arsyeja ne nuk e dimë. Ajo që kërkojmë është drejtësia. Djali im është i pafajshëm dhe nuk ka marrë pjesë në asnjë prej ngjarjeve kriminale për të cilat është i dyshuar. Janë të gjithë inskenime dhe tani ai duhet të qëndrojë rrugash dhe nuk mundet as të punojë as asgjë. Kërkojmë drejtësi dhe të zbardhen ngjarjet.
Policia ka ardhur në banesën tonë pas vrasjes së Arjan Ferracakut, një kohë që viktima ishte nipi im. Po ashtu kur u vra edhe Fatos Ferracaku prapë më kanë thirrur mua dhe djalin. Pastaj janë vrarë vëllezërit Bilali dhe sërish policia në banesën time një kohë që kemi kaq shumë vite që jemi fqinj. U plagos Admir Bajri, prapë në banesën time një kohë që familja jonë e ka patur një lloj njohje me familjen e tyre. Po ashtu u qëllua shefi i policisë bashkiake të Malësisë së Madhe sërish në banesën time, kur në fakt autorët dolën krejt persona të tjerë. Rasti i fundit është me Alban Bruçin, djalin e Lad Bruçit, të cilin unë e kam shumë mik dhe nuk ka asnjë shans që djali im të qëllojë djalin e tij kur ne kemi shumë miqësi aq më tepër që Bajrami, djali im është i monitoruar me kamera”, deklaroi fillimisht Ismet Çekorja.
Discussion about this post