Vrasja në Tropojë, zbardhen emrat

Një vrasje me thikë ka ndodhur në fshatin Breg-Lumë të Tropojës, ku viktimë ka mbetur një 24-vjeçar.

Një ditë më parë, në një lokal të fshatit buzë Fierzës, një 40-vjeçar goditi me thikë tre persona. Këtë të premte, policia konfirmoi se një prej të plagosurve – Ardian Pepkolaj, ka humbur jetën.

Lidhur me ngjarjen janë arrestuar pesë persona, të akuzuar se përkrahën autorin e vrasjes, ndërsa personi që qëlloi me thikë –  Saimir Sadikaj, nuk është arritur të vihet në pranga dhe është shpallur në kërkim.

“Më datë 11.07.2024, rreth orës 17:00, në një lokal në fshatin Breg-Lumë, për motive të dobëta, Saimir Sadikaj, 40 vjeç, plagosi me mjete prerëse shtetasit: Valentin Pepkolaj, 32 vjeç, Shkëlzen Kukaj, 45 vjeç, si dhe vëllanë e shtetasit Valentin Pepkolaj, shtetasin Ardian Pepkolaj, 24 vjeç, i cili si pasojë e plagëve, humbi jetën në spital”, njoftoi policia.

Dy të dëmtuarit vijojnë të jenë në kujdesin e mjekëve, ndërsa vijojnë kërkimet intensive për kapjen e shtetasit Saimir Sadikaj, shtuan të njëjtat burime.

Personat e arrestuar janë:

Andrin Qehaja, 39 vjeç, për veprat penale “Përkrahja e autorit të krimit” dhe “Moskallëzimi i krimit”;

-Xhevolin Macaj, 31 vjeç, për veprat penale “Veprime që pengojnë zbulimin e së vërtetës” dhe “Moskallëzimi i krimit”;

-Altin Shpendi, 34 vjeç, për veprën penale “Moskallëzimi i krimit”;

-Anton Boçi, 29 vjeç, për veprën penale “Moskallëzimi i krimit”;

-Jetmir Kuraj, 34 vjeç, për veprën penale “Moskallëzimi i krimit”.