Hetimet për vrasjen disa ditë më parë në Tropojë vijojnë teksa së fundmi në sitën e këtyre hetimeve është shtuar edhe shkaku për të cilën dyshohet të ketë ndodhur ngjarja. Sipas hetimeve të deritanishme dyshohet se një tokë në fshatin Çerem të Tropojës, e pretenduar nga dy familjet Goçaj dhe Ismajl Isufi, është bërë shkak për vrasjen e ndodhur dy ditë më parë në këtë fshat. Isat Goçaj dhe Altin Ismajlsufi jetonin në banesat përballë njëra-tjetrës dhe një sipërfaqe buzë rrugës pretendohej nga secili prej tyre .
Grupi hetimor i çështjes ka mësuar se dy familjet ishin në konflikt të vazhdueshëm prej 4 muajsh. Altin Ismajl Isufi tha në polici pas arrestimit se Goçajt i kërcënonin dhe dhunon vazhdimisht ne fshat te afermit e tij.
“Prej muajsh kishim debate të vazhdueshme. Isati më dhunonte familjen sapo i shihte në rrugë. Shkak i sherreve tona është një sipërfaqe toke që ndodhet pranë shtëpive tona. Edhe pak orë para se të takohesha me Isatin, djali më tha se ai e kishte dhunuar. Ndërsa nënën time e kishte shtyrë në oborr”, ka thënë Ismajl Isufi .
Kujtojmë se vrasja ndodhi rreth orës 15:30 të së shtunës. Ismajl Isufaj u arrestua nga uniformat blu 3 ore pas ngjarjes. Pas arrestimit te tij, policia sekuestroi edhe pistoletën me të cilën kreu vrasjen. Altin Ismajl Isufi kishte punuar si zjarrfikës.
