Policia e Vlorës ende nuk ka ndonjë person të ndalur lidhur me vrasjen e ndodhur mbrëmjen e së shtunës në këtë qytet, ku viktimë mbeti 41-vjeçari me dy identitet Leartiad Lekaj alias Laert Keka.
Policia ka sekuestruar kamerat e sigurisë, nga ku shpreson të identifikojë autorët e krimit, ndërsa dyshimet janë se ato janë vrasës me pagesë. Gjithashtu dyshime janë ngritur mbi automjetin audi A6, i përdorur nga vrasësit, i cili u gjet i shkrumbuar 25-30 minuta pas ngjarjes, se është përdorur kohë më parë në një tjetër krim në veri të vendit.
Në komisariatin e policisë së Vlorës, sipas raportimeve, kanë dhënë dëshmi 30 persona, kryesisht familjarë, shok e miq të viktimës, të cilët janë pyetur nëse 41-vjeçari ka pasur ose jo konflikte, kërcënime apo ishte i përfshirë në ndonjë veprimtari të paligjshme.
Policia gjithashtu ka mbledhur dëshmi nga persona, që në momentin e atentatit ndaj 41-vjeçarit, ndodheshin në vendin e ngjarjes në mënyrë rastësore.
Ndërkohë që nga dëshmitë e të afërmve është mësuar se viktima nuk ka pasur konflikte të viteve të fundit, ndërsa 41-vjeçari është hetuar dhe gjykuar për një ngjarje të ndodhur 23 vite më parë, ku gjatë një grabitjeje, mbeti i vrarë një person.
Gjithsesi policia po heton në disa pista, përveç asaj të hasmërisë, sikundër është raportuar.
Nga të dhënat e raportuara deri në tani, dyshohet se në krim kanë marrë pjesë dy persona, njëri në rolin e drejtuesit të mjetit dhe tjetri në atë të ekzekutorit.
Në drejtim të viktimës është qëlluar kur ai ka qënë në lëvizje me motor dhe më pas ai ka lënë motorin duke ecur për 100 metra në këmbë. Policia ka gjetur në vendin e ngjarjes dy lloj gëzhojash: pistolete dhe kallashnikovi.
Kjo ka ngritur dyshimet se viktima mund të jetë kundërpërgjigjur me armë ndaj autorit që ka qëlluar me breshëri automatike. Sipas raportimeve në trupin e viktimës janë gjetur të paktën 6 plumba, një prej të cilëve në kokë, që duket se i ka shkaktuar edhe vdekjen.
Autorëve i është dashur një kohë nga 12 deri në 15 minuta për tu larguar, ndërsa automjetin e përdorur në krim, dyshohet se i kanë vënë flakën në aksin Kotë-Sevaster.
Discussion about this post