Vrasja që tronditi Tiranën, Audi s’ishte i vjedhur por…

Mjeti tip “Audi” që u përdor nga dy autorët Albano Velo dhe Andreu alias Edvin Bode për vrasjes e Edmond Papës, nuk rezulton të jetë i vjedhur.

Rezulton se targat e huaja të këtij mjeti janë të mbivendosura dhe nuk kanë qenë të “Audi-t”, por të një mjeti tjetër. Makina që kishte të vendosura këto targa të huaja belge është futur brenda territorit të vendit tonë nga një person, i cili më pas e ka shitur makinën me targa shqiptare.

Policia po heton mënyrën se si targat e huaja përfunduan në duart e dy autorëve të vrasjes, të cilët më pas i montuan tek “Audi”, që shërbeu për t’u larguar nga vendi i ngjarjes pas vrasjes së 49-vjeçarit.

Albano Velo dhe Andreu (Edvin) Bode janë identifikuar nga Policia e Shtetit si dy personat që kanë planifikuar dhe vrarë biznesmenin Edmond Papa.

Velo ka pasur rolin e vëzhguesit, ndërsa Bode, atë të ekzekutorit. Vrasja e Papës dyshohet se është bërë si hakmarrje ndaj ekzekutimit të 27-vjeçarit Aleksandër Sadikaj, i cili u vra me shpërthim të eksplozivit në makinë.

Velo është vënë në pranga, ndërsa po hetohet dhe babai i tij, Dilaver Velo, i cili ishte punonjës policie në Komisariatin nr.4 në Tiranë, por pas përfshirjes së djalit në këtë ngjarje, u shkarkua.