Një ngjarje e rëndë ka ndodhur në fshatin Pla të Hasit ku ka mbetur i vdekur një 34 vjeçar . Ylber Jaku është autori i dyshuar i vrasjes së Reshit Sallahut.
Një ditë më parë, mes fisit Sallahu dhe fisit Jaku kishte ndodhur një sherr i ashpër, ku anëtarët e familjeve u përleshën me shkopinj.
Si pasojë e këtij konflikti, dy bashkëshortë përfunduan të plagosur dhe u dërguan në spital. Sherri kishte si motiv kryesor një mosmarrëveshje për pronësinë. Policia kishte nisur hetimet për të dyja palët.
Për plagosjen e çiftit u arrestua një vajzë 21-vjeçare, e dyshuar si autore e sulmit. Megjithatë, përplasjet nuk u ndalën këtu. Të mërkurën Ylber Jaku, 41 vjeç, i afërm i bashkëshortëve të plagosur, dyshohet se ka qëlluar për vdekje me armë zjarri Reshit Sallahut, 34 vjeç, familjar i vajzës së arrestuar.
Sipas dinamikës së ngjarjes, konflikti për pronësinë çoi fillimisht në plagosjen e çiftit dhe, për motive hakmarrjeje, sot njëri nga të afërmit e tyre dyshohet se kreu vrasjen fatale.
Policia dhe forcat mbështetëse shkuan menjëherë në vendngjarje, ku arrestuan autorin dhe sekuestruan armën e krimit. Hetimet janë ende në vijim dhe pritet të zbardhen rrethana të tjera.
Njoftimi i policisë:
Has/Informacion paraprak
Rreth orës 16: 40, është marrë njoftim se në fshatin Pla, shtetasi Y. J., 41 vjeç, dyshohet se ka vrarë me armë zjarri shtetasin R. S., 34 vjeç, dyshohet për motive pronësie
Në vendngjarje shkuan menjëherë shërbimet Policisë, si dhe në mbështetje të Policisë lokale shkuan Forcat e Posaçme Shiqponja të DVP Kukës.
Si rezultat i veprimeve të shpejta policore u bë kapja dhe arrestimi i autorit të dyshuar.
Në vendin e ngjarjes është gjetur dhe sekuestruar arma e zjarrit e dyshuar e përdorur nga autori.
Nën drejtimin e Prokurorisë, vijon puna për dokumentimin e plotë të ngjarjes.
Discussion about this post