Një ngjarje e rëndë ka tronditur fshatin Kryekuq të Divjakës, ku 32-vjeçari Besmir Kumria është vrarë me thikë në orët e para të mëngjesit. Pas disa orësh kërkimesh, Policia e Fierit ka arritur të identifikojë dhe të vërë në pranga autorin e dyshuar, 25-vjeçarin Xhesion Toromani.
Ngjarja ndodhi në një lokal, ku viktima ndodhej në shoqëri me miqtë e tij. Sipas dëshmitarëve, autori mbërriti me makinë, u fut në lokal dhe shkoi drejt e në tavolinën ku po qëndronte Kumria. Pa thënë asnjë fjalë, e ka qëlluar disa herë me thikë, duke e lënë të pajetë në vend.
Menjëherë pas krimit, autori u largua me shpejtësi. Dëshmitarët deklaruan se nuk e njihnin autorin dhe se ai nuk ishte banor i zonës. Policia konfirmoi se në lokal dhe në zonën përreth nuk kishte kamera sigurie, gjë që e bëri më të vështirë identifikimin e menjëhershëm të autorit.
Nga hetimet paraprake, policia dyshon se shkak i vrasjes është një konflikt i vazhdueshëm mes dy familjeve për një kanal vaditës në fshat. Pasi u kap, Toromani u dërgua në drejtorinë e policisë, ku ndaj tij rëndojnë akuzat për “Vrasje me paramendim” dhe “Prodhimi dhe mbajtja pa leje e armëve të ftohta”.
Një detaj i dhimbshëm i kësaj tragjedie është se viktima, Besmir Kumria, punonte në Himarë gjatë sezonit veror dhe ishte kthyer në fshatin e tij vetëm për të përcjellë bashkëshorten, e cila do të nisej drejt Gjermanisë pasi kishte siguruar një punë si infermiere. Trupi i viktimës është dërguar në morgun e qytetit të Lushnjës.
Discussion about this post